عمران خان خود اسمبلیاں توڑ دیں گے

لاہور(قدرت روزنامہ) پاکستان پیپلز پارٹی نبیل گبول کا کہنا ہے کہ عمران خان کو اندازہ ہو گیا ہے کہ وہ غیر مقبول ہو گئے ہیں، خود اسمبلی توڑیں گے۔انہوں نے 92 نیوز کے پروگرام دی لاسٹ آور میں میزبان یاسر رشید سے گفتگو میں مزید کہا کہ جب بلاول بھٹو بطور وزیراعظم حلف اٹھائیں گے تو خاتون اول کی کرسی خالی نہیں رہے گی۔انہوں نے کہا کہ موجودہ پارلیمنٹ میں اگر کسی سے کہا جائے کہ وہ وزیراعظم بننے تو کوئی بھی تیار نہیں ہو گا کیونکہ حالات کو اس قدر بگاڑ دیا گیا ہے جنہیں ٹھیک کرنے میں وقت لگے گا اس لیے عام انتخابات ضروری ہیں۔
مجھے نظر آ رہا ہے کہ وزیراعظم عمران خان خود اسمبلیاں توڑ دیں گے کیونکہ انہیں اندازہ ہو گیا ہے کہ وہ غیر مقبول ہو گئے ہیں۔

قبل ازیں پاکستان مسلم لیگ ن کے رہنما محمد زبیر نے کہا ہے کہ اپوزیشن 100 فیصد کبھی متحد نہیں ہو سکتی۔حکومت کو گھر بھیجنے کی حد تک تمام اپوزیشن جماعتیں ایک پیج پر ہیں۔وہاں پر ایشوز ایسے ہیں جن پر اپوزیشن کی دورائے ہو ہی نہیں سکتی۔

ن لیگ نے ووٹ کو عزت دو کا صرف نعرہ ہی نہیں لگایا بلکہ اس کے لیے بڑی قربانیاں دی ہیں۔ پچھلے تین سال میں جتنی مشکلات ن لیگ نے برداشت کی ہیں۔پاکستان کی تاریخ میں کسی جماعت نے کم ہی برداشت کی ہیں۔اِن ہاؤس تبدیلی اکھاڑ پچھاڑ سے ہی آ سکتی ہے۔ہم چاہتے ہیں کہ عمران خان کو مجبور کریں کہ وہ اسمبلیاں توڑ دیں۔ مسلم لیگ ن کے رہنما محمد زبیر نے دعویٰ کیا کہ حکومت سے ناراض ہونے والے بہت سے اراکین مسلم لیگ ن سے رابطے میں ہیں اور مناسب وقت میں ہمارے ساتھ شامل ہو جائیں گے۔انہوں نے کہا کہ پاکستان تحریک انصاف کے علاوہ بھی کچھ ایسی جماعتیں ہیں جو حکومت کے ساتھ ہیں، لیکن وہ پاکستان تحریک انصاف سے پہلے ہی روٹھے ہوئے ہیں۔