زرغون غر میں انٹیلیجنس بیسڈ آپریشن، 35 سے زائد خوارج ہلاک: شاہد رند

کوئٹہ (قدرت روزنامہ) معاون وزیر اعلیٰ بلوچستان برائے سیاسی و میڈیا امور شاہد رند نے کہا ہے کہ 13 مئی سے منگلہ زرغون غر کے علاقے میں ٹی ٹی پی اور فتنہ الہندوستان کے خلاف جاری کامیاب انٹیلیجنس بیسڈ آپریشن میں سیکیورٹی فورسز نے نمایاں کامیابیاں حاصل کی ہیں۔
انہوں نے بتایا کہ آپریشن کے دوران فتنہ الہندوستان کے 35 سے زائد خوارج کو جہنم واصل کیا گیا جبکہ دہشتگردوں کے متعدد ٹھکانے اور کیمپس مکمل طور پر تباہ کر دیے گئے ہیں۔
شاہد رند کے مطابق کارروائی کے دوران کالعدم تنظیم کے تین اہم کمانڈرز کو بھی گرفتار کیا گیا ہے، جن سے انتہائی اہم معلومات حاصل ہوئی ہیں۔ انہی معلومات کی بنیاد پر مزید ٹارگٹڈ کارروائیاں جاری ہیں اور فتنہ الخوارج کے سہولت کاروں اور پشت پناہی کرنے والے عناصر کے گرد گھیرا مزید تنگ کیا جا رہا ہے۔
انہوں نے کہا کہ ریاست پاکستان دہشتگردی کے ناسور کے مکمل خاتمے تک چین سے نہیں بیٹھے گی۔ بلوچستان کے امن کو خراب کرنے والے عناصر اور ان کے سہولت کاروں کو ہر صورت منطقی انجام تک پہنچایا جائے گا۔
شاہد رند نے مزید کہا کہ سیکیورٹی فورسز اور قانون نافذ کرنے والے ادارے پوری قوت، عزم اور پیشہ ورانہ مہارت کے ساتھ دشمن کے ناپاک عزائم ناکام بنا رہے ہیں۔
انہوں نے کہا کہ یہ آپریشن نہ صرف علاقے بلکہ پورے ملک کے امن، استحکام اور قومی مفاد کے لیے ناگزیر ہے اور یہ کارروائیاں فتنہ الخوارج کے مکمل خاتمے تک بلا تعطل جاری رہیں گی۔
انہوں نے عوام سے اپیل کی کہ وہ سیکیورٹی فورسز اور ریاستی اداروں کے ساتھ مکمل تعاون کریں، مشکوک عناصر کی نشاندہی کریں اور دہشتگردی کے خلاف قومی جنگ میں اپنا بھرپور کردار ادا کریں۔
ان کا کہنا تھا کہ پوری قوم اپنی بہادر افواج اور سیکیورٹی اداروں کے شانہ بشانہ کھڑی ہے، جبکہ دشمن کے تمام مذموم عزائم کو ناکام بنایا جائے گا اور بلوچستان کو امن، ترقی اور خوشحالی کی راہ پر گامزن رکھا جائے گا۔