خطبہ حج 2026 کے لیے اہم اعلان، شیخ علی الحذیفی خطیب مقرر

اسلام آباد (قدرت روزنامہ)حرمین شریفین کی جانب سے خطبہ حج 2026 کے لیے اہم اعلان سامنے آ گیا ہے جس کے مطابق اس سال مسجد نبوی ﷺ کے معروف امام و خطیب شیخ ڈاکٹر علی الحذیفی کو خطبۂ حج دینے کی سعادت حاصل ہوگی۔ اس اعلان کے بعد دنیا بھر میں موجود حجاج کرام کے لیے یہ خبر خصوصی اہمیت اختیار کر گئی ہے۔
تفصیلات کے مطابق شیخ علی الحذیفی 9 ذی الحج 1447 ہجری، بروز منگل 26 مئی کو میدان عرفات کی مسجد نمرہ میں خطبۂ حج دیں گے۔ اسی دن حج کا رکن اعظم وقوف عرفہ ادا کیا جائے گا، جس کے لیے لاکھوں عازمین حج میدان عرفات میں جمع ہوں گے۔
ادارۂ امورِ حرمین شریفین نے باضابطہ طور پر تصدیق کی ہے کہ اس سال کے خطبہ حج 2026 کے لیے شیخ علی الحذیفی کا انتخاب ان کے علمی مقام، دینی خدمات اور عالمی سطح پر قرآنی قرأت کے منفرد انداز کے باعث کیا گیا ہے۔
شیخ علی الحذیفی نہ صرف مسجد نبوی ﷺ کے امام ہیں بلکہ وہ ماضی میں مسجد قبا اور مسجد الحرام میں بھی امامت و خطابت کے فرائض انجام دے چکے ہیں۔ انہیں عالم اسلام میں ایک ممتاز قراء کرام اور بااثر مذہبی شخصیت کے طور پر جانا جاتا ہے۔
سعودی حکام کے مطابق اس سال عیدالاضحیٰ 27 مئی 2026 کو منائی جائے گی، جبکہ حج کے اہم مناسک 26 مئی کو وقوف عرفہ کے ساتھ مکمل ہوں گے۔
یہ اعلان حج سیزن کے آغاز کے ساتھ ہی دنیا بھر کے مسلمانوں کے لیے روحانی جذبات اور عقیدت میں مزید اضافہ کر رہا ہے۔