سماجی انصاف کے بغیر معاشی اصلاحات بے اثر ہو جاتی ہیں، گورنر بلوچستان جعفر خان مندوخیل

کوئٹہ + اسلام آباد (قدرت روزنامہ) گورنر بلوچستان Jaffar Khan Mandokhail نے کہا ہے کہ دنیا کے تمام مہذب اور ترقی یافتہ ممالک میں سماجی انصاف، عدالتی انصاف سے پہلے بنیادی حیثیت رکھتا ہے، اور اس کے بغیر معاشی اصلاحات اور گورننس کے اقدامات مؤثر ثابت نہیں ہوتے۔
اپنے ایک بیان میں انہوں نے کہا کہ سماجی انصاف بنیادی حقوق، مساوی مواقع اور شہریوں کے جان و مال کے تحفظ کو یقینی بناتا ہے۔ ان کے مطابق اچھی حکمرانی اور معاشی پالیسیوں کی اصل کامیابی اسی بات سے جڑی ہے کہ ان کے ثمرات عام آدمی تک پہنچ رہے ہیں یا نہیں۔
گورنر بلوچستان نے کہا کہ کسی بھی معاشرے کی اصل طاقت عام شہری کو پالیسی سازی اور ترقیاتی منصوبوں کا مرکز بنانا ہے۔ انہوں نے زور دیا کہ جب حکومتی ادارے ترقیاتی فریم ورک تشکیل دیتے ہیں تو اس کا جائزہ اس بات سے لیا جاتا ہے کہ آیا اس کے اثرات عوام کی زندگیوں میں بہتری لا رہے ہیں یا نہیں۔
انہوں نے خبردار کیا کہ اگر معاشی ترقی کے ثمرات عام لوگوں تک نہ پہنچیں تو اس سے غربت، اسٹریٹ کرائم اور ناانصافی میں اضافہ ہوتا ہے۔
Jaffar Khan Mandokhail نے مزید کہا کہ سماجی ناانصافی، میرٹ کی پامالی اور مساوی مواقع کی کمی معاشرتی بے چینی، بداعتمادی اور منفی رویوں کو جنم دیتی ہے، جو پورے معاشرتی ڈھانچے کو متاثر کرتی ہے۔
انہوں نے کہا کہ پائیدار امن، معاشی خوشحالی اور سیاسی استحکام کے لیے ضروری ہے کہ تمام سیاسی و معاشی سرگرمیوں میں عوام کی مؤثر شرکت کو یقینی بنایا جائے۔