فیفا ورلڈکپ: میسی کے ریکارڈ ساز گول، ارجنٹینا نے آسٹریا کو شکست دیکر راؤنڈ آف 32 میں جگہ بنالی

ڈیلاس(قدرت روزنامہ)فیفا ورلڈ کپ 2026 میں ارجنٹینا نے میسی کے 2 شاندار گولز کی بدولت آسٹریا کو شکست دے کر راؤنڈ آف 32 میں جگہ بنا لی۔
پیر کو ڈیلاس اسٹیڈیم میں ارجنٹینا نے فیفا ورلڈ کپ 2026 میں شاندار کارکردگی دکھاتے ہوئے گروپ جے کے میچ میں آسٹریا کو 0-2 سے شکست دے کر راؤنڈ آف 32 کے لیے کوالیفائی کر لیا۔
یہ ارجنٹینا کی مسلسل دوسری کامیابی تھی۔
میچ کا فیصلہ کن لمحہ 39ویں منٹ میں آیا جب لیونل میسی نے پہلا گول کر کے برتری دلائی۔ اس سے قبل پہلے ہاف میں ارجنٹینا کو پنالٹی ملی تھی مگر وہ ضائع ہوگئی، اس کے باوجود ٹیم نے کئی خطرناک حملے کیے۔
دوسرے ہاف کے آغاز میں آسٹریا نے واپسی کی کوشش کی۔ 47ویں منٹ میں مارسل سابٹزر نے گول کے قریب خطرناک شاٹ لگایا، تاہم وہ درست کنٹرول نہ کر سکے اور ارجنٹینا کے دفاع نے آسانی سے خطرہ ٹال دیا۔
میسی مسلسل ارجنٹینا کے حملوں کا مرکز رہے۔ ایک موقع پر 2 کھلاڑیوں کو چکمہ دے کر انہوں نے فری کک حاصل کی، مگر اس سے کوئی گول نہ بن سکا۔
56ویں منٹ میں آسٹریا کو بھی فری کک ملی، لیکن ایمیلیانو مارٹینیز نے معمولی سیو کر کے برتری برقرار رکھی۔
میچ کے اختتامی لمحات میں ارجنٹینا نے برتری دگنی کر دی۔ اسٹاپیج ٹائم میں میسی نے ایک اور گول داغ کر اسکور 0-2 کر دیا، جس کے فوراً بعد ریفری نے میچ ختم کر دیا۔
اس فتح کے ساتھ ارجنٹینا نے نہ صرف 3 پوائنٹس حاصل کیے بلکہ ٹورنامنٹ کے اگلے مرحلے میں بھی اپنی جگہ پکی کر لی۔
میسی ورلڈکپ میں سب سے زیادہ گول کرنیوالے فٹبالر بن گئے
میسی نے فیفا ورلڈکپ 2026 کے میچ میں آسٹریا کے خلاف ریکارڈ ساز گول کیا اور ورلڈکپ مقابلوں میں سب سے زیادہ گول کرنے والے پلیئر بن گئے۔
آسٹریا کے خلاف 2 گولز کی بدولت لیونل میسی کے فٹبال ورلڈکپ میں گولز کی مجموعی تعداد 18 ہوگئی ہے جس کے ساتھ ہی انہوں نے جرمنی کے اسٹار فٹبالر میرو سلاو کلوزے (MIROSLAV KLOSE) کا 16 گولز کا ریکارڈ توڑ دیا۔
میسی کے بعد اب اس فہرست میں میرو سلاوکلوزے 16 گولز کے ساتھ دوسرے نمبر پر آگئے ہیں جب کہ برازیل کے رونالڈو نزارویو 15 گولز کے ساتھ تیسرے نمبر پر ہیں۔