آبنائے ہرمز بین الاقوامی آبی گزرگاہ ہے، کوئی ملک ٹول یا فیس عائد نہیں کر سکتا: امریکی وزیر خارجہ

واشنگٹن(قدرت روزنامہ)ایران امریکا معاہدے پر خلیجی اتحادیوں کو اعتماد میں لینے کے لیے امریکی وزیرخارجہ مارکو روبیو ابوظبی پہنچ گئے۔
امریکی میڈیا کے مطابق خلیجی ممالک کو امریکا کی جانب سے سکیورٹی کی یقین دہانیاں دینے کا امکان ہے ۔
ابوظبی پہنچنے پر امریکی وزیرخارجہ مارکو روبیو نے ایک بار پھر کہا کہ آبنائے ہرمز بین الاقوامی آبی گزرگاہ ہے ، عالمی قوانین کے مطابق کسی ملک کو آبنائے ہرمز پر ٹول یا فیس عائد کرنے کی اجازت نہیں۔
امریکی وزیرخارجہ مارکو روبیو نے صحافیوں سے گفتگو کرتے ہوئے کہا کہ آبنائے ہرمز پر کوئی ملک ٹول یا فیس عائد نہیں کر سکتا، عالمی آبی راستے پر ٹیکس یا فیس لگانا بین الاقوامی قانون کے خلاف ہے۔ خطے کے تمام ممالک امریکا کے مؤقف سے اتفاق کرتے ہیں۔
مارکو روبیو نے کہا کہ ایران کو انقلابی تحریک کے بجائے بطور ریاست کام کرنا ہوگا، ایران ریاست کے طور پر کام کرے تو بڑی ترقی کے مواقع ہیں، خطے میں جب تک ایرانی پراکسیز حملے کریں گے کشیدگی ختم نہیں ہو سکتی۔
امریکی وزیر خارجہ نے کہا کہ عراق سے میزائل اور ڈرون حملے علاقائی امن کیلئے بڑا خطرہ ہیں، عراق میں بھی حماس، حزب اللہ جیسے گروہ دہشتگردی میں ملوث ہیں، امریکا ایران بات چیت میں یہ موضوع بھی جلد زیر بحث آئے گا۔
واضح رہے کہ عمان اور ایران نے منگل کے روز ایک مشترکہ اعلامیے میں کہا تھا کہ دونوں ممالک آبنائے ہرمز کے مستقبل کے انتظام اور فراہم کی جانے والی خدمات کے عوض وصول کی جانے والی فیس کا جائزہ لیں گے۔