رونالڈو کی پنالٹی سے پہلے مبینہ طور پر بسم اللہ الرحمان الرحیم پڑھنے کی ویڈیو وائرل
اسلام آباد (قدرت روزنامہ)فٹبال کی دنیا کے بڑے نام کرسٹیانو رونالڈو کا ایک مختصر سا لمحہ سوشل میڈیا پر خاص توجہ حاصل کر رہا ہے، جہاں انہیں ایک اہم پنالٹی لینے سے پہلے بسم اللہ پڑھتے ہوئے دیکھا گیا۔ پرتگال سے تعلق رکھنے والے اسٹار فٹبالر کے اس انداز نے خاص طور پر مسلمان مداحوں کو متاثر کیا جنہوں نے ویڈیو کو بڑے پیمانے پر شیئر کیا۔
کرسٹیانو رونالڈو کو فٹبال کی تاریخ کے کامیاب ترین کھلاڑیوں میں شمار کیا جاتا ہے۔ وہ اپنے طویل کیریئر میں کئی عالمی ریکارڈ بنا چکے ہیں اور مسلسل عمدہ کارکردگی کی وجہ سے دنیا بھر میں پہچانے جاتے ہیں۔ انسٹاگرام پر سب سے زیادہ فالو کیے جانے والے افراد میں شامل رونالڈو کی مقبولیت صرف فٹبال دیکھنے والوں تک محدود نہیں بلکہ ان کا نام کھیل سے دور رہنے والے لوگ بھی جانتے ہیں۔
رونالڈو اس وقت سعودی عرب کے کلب النصر کے لیے کھیل رہے ہیں، جہاں ان کی ملاقات مختلف مسلم ممالک سے تعلق رکھنے والے کھلاڑیوں اور ساتھیوں سے ہوتی ہے۔ گزشتہ چند برسوں میں ان کے بعض انداز اور الفاظ نے بھی مداحوں کی توجہ حاصل کی ہے جنہیں لوگ سعودی عرب اور مسلم ساتھیوں کے ماحول کا اثر قرار دیتے ہیں۔
حالیہ میچ کے دوران رونالڈو کو ایک اہم پنالٹی کک کا موقع ملا۔ ویڈیو میں دیکھا جا سکتا ہے کہ وہ گیند کے قریب جانے سے پہلے بسم اللہ کہتے ہیں، جس کے بعد انہوں نے پنالٹی لینے کی تیاری کی۔ یہ مختصر لمحہ جلد ہی سوشل میڈیا پر وائرل ہو گیا۔
مسلمان مداحوں نے رونالڈو کے اس عمل کو پسند کیا اور کہا کہ اہم موقع پر اللہ کا نام لینا ان کے لیے خوشی اور جذبات کا باعث بنا۔ بعض صارفین نے اسے بسم اللہ کی برکت سے جوڑا جبکہ کئی مداحوں نے لکھا کہ رونالڈو نے ایک بار پھر اپنے رویے سے لوگوں کے دل جیت لیے۔
