پاکستان میں اسمارٹ فونز کی درآمدات میں نمایاں اضافہ، 11 ماہ میں 1.74 ارب ڈالر سے زائد مالیت کے موبائل فون درآمد

لاہور(قدرت روزنامہ)پاکستان میں رواں مالی سال کے دوران اسمارٹ فونز کی درآمدات میں نمایاں اضافہ ریکارڈ کیا گیا ہے، جس کی بنیادی وجوہات میں اسمارٹ فونز کی بڑھتی ہوئی طلب، جدید موبائل ٹیکنالوجی کا تیزی سے فروغ اور ڈیجیٹل سہولیات کا بڑھتا ہوا استعمال شامل ہیں۔
وفاقی ادارہ شماریات کی تازہ ترین رپورٹ کے مطابق گزشتہ مالی سال کے مقابلے میں رواں مالی سال کے ابتدائی 11 ماہ کے دوران بیرون ملک سے درآمد کیے گئے موبائل فونز کی مالیت میں تقریباً 29 فیصد اضافہ ہوا ہے۔
رپورٹ کے مطابق جولائی سے مئی تک کے عرصے میں پاکستان نے ایک ارب 747 ملین 533 ہزار امریکی ڈالر مالیت کے اسمارٹ فونز درآمد کیے، جن کی پاکستانی روپے میں مجموعی مالیت 491 ارب روپے سے تجاوز کر گئی۔ اس کے برعکس گزشتہ مالی سال کے اسی عرصے کے دوران ملک میں تقریباً ایک ارب 350 ملین امریکی ڈالر مالیت کے موبائل فونز درآمد کیے گئے تھے، جس کے مقابلے میں رواں سال درآمدات میں واضح اضافہ دیکھنے میں آیا ہے۔
وفاقی ادارہ شماریات کی رپورٹ میں مزید بتایا گیا ہے کہ موبائل فونز کے ساتھ ساتھ دیگر ٹیلی کام آلات کی درآمدات میں بھی اضافہ ریکارڈ کیا گیا ہے۔ گزشتہ 11 ماہ کے دوران تقریباً 394 ملین امریکی ڈالر مالیت کا ٹیلی کام سامان درآمد کیا گیا، جس کی پاکستانی روپے میں مالیت تقریباً 195 ارب روپے بنتی ہے۔
ماہرین کے مطابق پاکستان میں ڈیجیٹلائزیشن کے فروغ، آن لائن خدمات کے بڑھتے ہوئے استعمال، جدید اسمارٹ فونز کی دستیابی اور انٹرنیٹ پر مبنی سہولیات کی توسیع کے باعث موبائل فونز اور ٹیلی کام آلات کی طلب میں مسلسل اضافہ ہو رہا ہے۔
اعداد و شمار سے ظاہر ہوتا ہے کہ ملک میں اسمارٹ فونز اور ٹیلی کام ٹیکنالوجی کی مارکیٹ تیزی سے وسعت اختیار کر رہی ہے، جس کے نتیجے میں درآمدات میں بھی خاطر خواہ اضافہ ریکارڈ کیا جا رہا ہے۔