عثمان خواجہ کا پاکستان میں آکر دوبارہ کرکٹ کھیلنے کی خواہش کا اظہار

سڈنی (قدرت روزنامہ) آسٹریلیا کے مایہ ناز بیٹر عثمان خواجہ نے پاکستان میں آکر دوبارہ کرکٹ کھیلنے کی خواہش کا اظہار کرتے ہوئے کہا ہے کہ مجھے بنگلا دیش، بھارت اور خاص طور پر پاکستان جہاں پیدا ہوا ہوں، سپورٹ ملتی ہے . ایک انٹرویومیں عثمان خواجہ نے کہا کہ مجھے برصغیر میں سپورٹ ملتی ہے، بنگلا دیش، بھارت اور خاص طور پر پاکستان میں جہاں میں پیدا ہوا ہوں .

انہوں نے کہا کہ جون جولائی میں پاکستان سپر لیگ کھیلی، اس میں میرے لیے سپورٹ بہت ہی شاندار تھی، میں وہاں دوبارہ جا کر کھیلنا چاہتا ہوں اور یہ بہت دور بھی نہیں ہے . انہوں نے کہا کہ میں نے اپنے ساتھیوں سے بات کی ہے کہ پاکستانی جنریشن آپ سے بہت متاثر ہے، جس نے کبھی ڈیوڈ وارنر، مارش اور سٹیو سمتھ کو اپنی آنکھوں کے سامنے میدان میں کھیلتے نہیں صرف ٹی وی پر ہی دیکھا ہے .

آسٹریلوی کرکٹر نے کہا کہ حقیقت میں آپ کرکٹ کی نئی جنریشن کیلئے متاثر کن ہیں لیکن ہم وہاں جا کر کھیل کی بحالی کھیل کے فروغ اور بہتری کیلیے اپنا کردار ادا کر سکتے ہیں . عثمان خواجہ نے کہا کہ میرے خیال میں اس گیم کو دینے کے لیے ہمارے پاس دورہ پاکستان ایک اچھا موقع ہے، جو طویل عرصے سے کرکٹ سے محروم رہا ہے . انہوں نے کہا کہ میں پرامید ہوں نہ صرف اپنے لیے بلکہ پاکستان کرکٹ اور ان تمام نوجوان لڑکے اور لڑکیوں کے لیے جو مستقبل میں پروفیشنل کرکٹر بننا چاہتے ہیں .