ڈاکٹرز میری حالت دیکھ کر حیران تھے کہ چل پھر کیسے رہا ہوں: عابد علی

لاہور (قدرت روزنامہ) قومی ٹیم کے اوپننگ بیٹسمین عابد علی کی انجیو پلاسٹی ہو چکی ہے اور وہ نیشنل ہائی پرفارمنس سینٹر میں ری ہیب پروگرام شروع کر چکے ہیں ، ٹیسٹ اوپنر نے اپنی بیماری سے متعلق کہا کہ جیسے ٹیسٹ کرکٹ کی دوسری اننگ ہوتی ہے ، ایسی ہی انہیں بھی دوسری اننگ ملی ہے ، جس پر وہ رب کا جتنا شکر ادا کریں وہ کم ہے .
تفصیلات کے مطابق عابد علی کا کہناتھا کہ بیٹنگ کے دوران سینے میں بوجھ اور گبھراہٹ محسوس ہوئی تو کریز کے دوسرے اینڈ پر موجود اظہر علی نے مشورہ دیا کہ میں پوویلین لوٹ جائوں ، ان کے مشور اور ایمپائر کی اجازت سے گراونڈ چھوڑ کر باہر آنے کا فیصلہ کیا ، باہر جاتے ہی باونڈری کے پاس قے آئی اور سر چکرانے لگا ، اس موقع پر سینٹرل پنجاب کے فیزیو ڈاکٹر اسد نے انہیں فوری ہسپتال منتقل کر دیا .

عابد علی نے کہا کہ وہ ابھی تک اسے عام بیماری سمجھ رہے تھے لیکن ہسپتال کے ڈاکٹرز نے ان کی حالت دیکھ کر حیران ہوتے ہوئے کہا کہ میں چل پھر کیسے رہا ہوں کیونکہ میری ای سی جی ٹھیک نہیں ہے ، دل کی دو شریانیں بند ہیں ، ڈاکٹرز نے بتایا کہ ایک آدمی کا دل 55 فیصد کام کراتا ہے جب کہ میرا 30 فیصد کر رہا تھا .