11 ارب کے جہاز اور لگژری گاڑیوں کا حساب کون دے گا؟ مونس الٰہی کا مریم نواز سے سوال
لاہور (قدرت روزنامہ) پاکستان تحریک انصاف کے رہنما اور سابق وفاقی وزیر مونس الٰہی نے وزیراعلیٰ پنجاب کے حالیہ بیانات پر سخت ردِعمل کا اظہار کرتے ہوئے صوبائی حکومت پر مالی بدعنوانی، شاہ خرچیوں اور مختلف منصوبوں میں بھاری کمیشن لینے کے سنگین الزامات عائد کردیئے۔ تفصیلات کے مطابق سوشل میڈیا سائٹ ایکس پر اپنے ایک بیان میں مونس الٰہی نے وزیراعلیٰ پنجاب کے “کسی کو کھانے نہیں دوں گی” والے بیان کو آڑے ہاتھوں لیا، انہوں نے تنقیدی ہیش ٹیگ MadamThiefMinister# کا استعمال کرتے ہوئے لکھا کہ ‘کسی کو کھانے نہیں دوں گی’ کا بیان دینے والوں کا اپنا نامہ اعمال سب کے سامنے ہے، کیا اب بلی دودھ پر پہرہ دے گی؟۔
"کسی کو کھانے نہیں دونگی" #MadamThiefMinister کا بیان۔ 11 ارب کا جہاز، اربوں کی لگژری گاڑیاں، گندم کی خریداری سے لیکر ستھرا پنجاب میں اربوں کی ہیرا پھیری، الیکٹرک بسوں میں بھاری کمیشن کون کھا گیا؟ بلی دودھ پر پہرہ دے گی ؟
— Moonis Elahi (@MoonisElahi) September 5, 2026
مونس الٰہی نے پنجاب حکومت کی جانب سے کی جانے والی مبینہ شاہ خرچیوں اور ترقیاتی منصوبوں میں ہیرا پھیری کی فہرست جاری کرتے ہوئے سوالات اٹھائے کہ 11 ارب روپے کا جہاز اور اربوں روپے کی لگژری گاڑیاں کس کے استعمال کے لیے اور کس کے پیسوں سے خریدی گئیں؟ گندم کی سرکاری خریداری کے اسکینڈل سے لے کر ستھرا پنجاب جیسے صفائی کے پروگرام میں اربوں روپے کی ہیرا پھیری کی گئی۔
انہوں نے الزام لگایا کہ الیکٹرک بسوں کی ترسیل اور خریداری کے معاہدوں میں بھاری رقم کمیشن کی مد میں ہڑپ کی گئی، اگر وزیراعلیٰ شفافیت کی دعویدار ہیں تو ان تمام منصوبوں میں ہونے والے اربوں روپے کے معاشی نقصان اور کمیشن کا جواب دہ کون ہے؟۔
