یہ جو تین مسخرے ٹی وی پر بیٹھ کر بکواس کرتے ہیں، یہ ہمارے شہیدوں کی توہین کررہے ہیں، سہیل آفریدی
پشاور (قدرت روزنامہ) وزیراعلیٰ خیبرپختونخواہ سہیل آفریدی کا کہنا ہے کہ یہ جو تین مسخرے ٹی وی پر بیٹھ کر بکواس کرتے ہیں، یہ ہمارے شہیدوں کی توہین کررہے ہیں، ان کو کیا؟ انہوں نے تو کبھی گرم ہوا بھی نہیں دیکھی، خون تو ہمارا بہہ رہا ہے۔ انہوں نے تقریب سے خطاب کے دوران کہا کہ یہ جو تین مسخرے ٹی وی پر بیٹھ کر بکواس کرتے ہیں، یہ ہمارے شہیدوں کی توہین کررہے ہیں، ہمارے 80ہزار لوگوں کی توہین کررہے ہیں ،ہمارے پولیس اور فوجی جوان جو دہشتگردی کی جنگ میں شہید ہوئے ہیں ان کی شہادت کی توہین کررہے ہیں،ان کو کیا؟ انہوں نے تو کبھی گرم ہوا بھی نہیں دیکھی، یہ جہاں پر بیٹھتے ہیں وہاں تو گرم ہوا بھی نہیں لگتی، خون تو ہمارا بہہ رہا ہے، لوگ تو ہمارے زخمی ہورہے ہیں۔
یہ جو تین مسخرے ٹی وی پہ بیٹھ کر بکواس کرتے ہیں یہ ہماری شہیدوں کی توہین کرتے ہیں ! سہیل آفریدی 🔥 pic.twitter.com/ujLc6hC2Db
— AMJAD KHAN (@iAmjadKhann) September 29, 2026
وزیراعلیٰ خیبرپختونخواہ سہیل آفریدی نے کہا کہ اس پروگرام میں سب سے پہلے میں نے آتے ہی منسٹر صاحب سے پوچھا کہ اس پروگرام کا خرچہ سرکاری ہے یا آپ کا ہے تو انہیں خود بھی پتہ نہیں تھا، اگر سرکاری خرچہ ہوا تو میں برداشت نہیں کروں گا یہ منسٹر خود اپنی جیب سے دیں گے۔ جو لوگ حکومت میں عوامی مینڈیٹ کے ساتھ آتے ہیں ان کو عوام کی فکر ہوتی ہے وہ اپنے لئے11ارب کا جہاز نہیں خریدتے۔
وہ اپنے لئے 30، 30 کروڑ والی گاڑیا ں نہیں منگواتے،ان کے تمام اقدامات عوام کیلئے ہوتے ہیں۔ سہیل آفریدی نے کہا کہ 4 اکتوبر کو پاکستان کی تاریخ کا بڑا لانگ مارچ ہو گا ، کوئی بھی دھمکی، کوئی بھی زورزبردستی ، کوئی بھی بندوق ، کوئی بھی ڈنڈا،ہمیں اپنے مقصد سے ایک انچ بھی پیچھے نہیں ہٹا سکتا، یہ عہدے اور کرسیاں یہ ان کے لئے معنی رکھتے ہیں جن کا کوئی ذاتی مفاد ہو۔
انہوں نے کہا کہ ہر وہ پالیسی تبدیل ہوگی جو میرے پختونوں کی سر کی قیمت لگائے گی، ہر وہ پالیسی تبدیل ہوگی جس سے خیبرپختونخواہ لہولہان ہوگا، ہر وہ پالیسی تبدیل ہوگی جس میں پاکستان کی بھلائی نہیں ہوگی۔
کچھ لوگ جیب بھرنے اور ڈالرز کیلئے ، کچھ لوگ جزیرے خریدتے ہیں، باہر اپنے لء فلیٹ خریدتے ہیں، ان کیلئے میرے لوگوں کا خون کسی بھی قیمت پر نہیں بہے گا، اس کیخلاف ہم کھڑے ہوں گے اور اگر ضرورت پڑی تو بغاوت بھی کریں گے، لیکن ہر اس پالیسی کو نہیں مانیں گے جس سے میرے لوگ شہید ہوں ۔
