منشیات ڈیلر انمول پنکی کی ویڈیو لنک پر عدم پیشی، عدالت کا آئندہ سماعت پر پیش کرنے کا حکم

کراچی(قدرت روزنامہ)جوڈیشل مجسٹریٹ جنوبی نے منشیات اور اسلحہ برآمدگی کے مقدمات میں ملزمہ انمول عرف پنکی کو آئندہ سماعت پر پیش کرنے کا حکم دے دیا۔
جیل حکام کی جانب سے ملزمہ اور شریک ملزمان کو ویڈیو لنک کے ذریعے آج پیش نہیں کیا گیا۔
عدالت نے ملزمان کو آئندہ سماعت پر لازمی پیش کرنے کا حکم دے دیا جبکہ ملزمہ انمول پنکی کو بھی عدالت میں پیش کرنے کی ہدایت جاری کی گئی۔
عدالت نے ریمارکس دیے کہ ملزمہ انمول عرف پنکی کی عدالت میں حاضری لازمی ہے، ویڈیو لنک کے ذریعے مقدمہ کی نقول فراہم کرنا ناممکن ہے۔
عدالت نے سماعت 13 اکتوبر تک ملتوی کرتے ہوئے مفرور ملزمان کو اشتہاری قرار دینے کی کارروائی جاری رکھنے کی ہدایت کر دی۔
پراسیکیوشن کے مطابق ملزمان کو رواں سال گرفتار کیا گیا تھا، ملزمہ انمول پنکی بڑے پیمانے پر منشیات کی خرید و فروخت کا دھندا کرتی تھی۔
ملزمان کے خلاف تھانہ گارڈن میں مقدمات درج کیے گئے تھے۔