موبائل اسکرین کے پیچھے چھپا خطرہ، بچوں کو تشدد اور خودکشی پر اکسانے والے آن لائن گروہ سرگرم

کراچی (قدرت روزنامہ)کراچی میں نیشنل سائبر کرائم انویسٹی گیشن ایجنسی (این سی سی آئی اے) کی جانب سے 13 سالہ بچی کو مبینہ طور پر ڈارک ویب سے منسلک خطرناک آن لائن نیٹ ورک کے اثرات سے بروقت محفوظ بنانے کے واقعے نے بچوں کی ڈیجیٹل حفاظت کے حوالے سے ایک بار پھر سوالات کھڑے کیے ہیں۔
حکام کے مطابق بچی کو پہلے ایک بلی کو زہر دے کر مارنے اور بعد ازاں خود کو نقصان پہنچانے کے ٹاسک دیے جا رہے تھے، ایجنسی نے بروقت مداخلت کرتے ہوئے بچی کو تحفظ فراہم کیا اور اس کے والدین کو بھی صورتحال سے آگاہ کیا۔
بچوں کے لیے انٹرنیٹ جہاں تعلیم، معلومات اور تفریح کے وسیع مواقع فراہم کرتا ہے وہیں اس کے ذریعے نامعلوم افراد اور نقصان دہ آن لائن گروہوں تک رسائی بھی ممکن ہے جو بچوں کے رویوں، جذبات اور کم عمری کا فائدہ اٹھا کر انہیں خطرناک سرگرمیوں کی طرف مائل کرسکتے ہیں۔
سائبر سکیورٹی ماہرین کے مطابق نقصان دہ آن لائن گروہ بچوں سے رابطے کے لیے انٹرایکٹو ویڈیو گیمز، سوشل میڈیا پلیٹ فارمز اور میسجنگ ایپس استعمال کرتے ہیں، ان پلیٹ فارمز پر بچوں کے لیے یہ جاننا مشکل ہوتا ہے کہ دوسری جانب موجود شخص واقعی ان کی عمر کا ہے یا جعلی شناخت کے ذریعے ان سے رابطہ کررہا ہے۔
ایسے گروہ بظاہر عام گفتگو، دوستی، مشترکہ دلچسپیوں یا گیمز کے ذریعے بچوں کا اعتماد حاصل کرنے کی کوشش کرتے ہیں۔
بعد ازاں انہیں نجی چیٹس یا دوسرے پلیٹ فارمز پر منتقل کرکے ان پر دباؤ ڈالنے، خفیہ سرگرمیوں میں شامل کرنے یا خطرناک چیلنجز قبول کرنے پر آمادہ کیا جاتا ہے، بعض کیسز میں بچوں کو مرحلہ وار ایسے کام دیے جاتے ہیں جن کے ذریعے ان کی مزاحمت کم کرنے، انہیں دوسروں سے الگ تھلگ کرنے یا ان کے رویے پر اثرانداز ہونے کی کوشش کی جاتی ہے۔
ان سرگرمیوں میں جانوروں کو نقصان پہنچانے، دوسروں کے خلاف تشدد یا خود کو نقصان پہنچانے جیسے خطرناک اقدامات شامل ہوتے ہیں تاہم ہر آن لائن چیلنج یا ویڈیو گیم کو کسی منظم مجرمانہ نیٹ ورک سے منسلک قرار نہیں دیا جا سکتا، کسی مخصوص واقعہ میں ڈارک ویب سے تعلق اور گروہ کی نوعیت کی تصدیق کے لیے ڈیجیٹل شواہد اور باقاعدہ تحقیقات ضروری ہیں۔
ماہرین کے مطابق ڈارک ویب انٹرنیٹ کا ایسا حصہ ہے جس تک رسائی کے لیے عموماً مخصوص سافٹ ویئر یا ترتیبات درکار ہوتی ہیں، اس کے بعض استعمال جائز بھی ہیں تاہم اس کے کچھ حصوں کو غیر قانونی سرگرمیوں، گمنام رابطوں اور مجرمانہ نیٹ ورکس کے لیے استعمال کیا جاتا ہے۔
بچوں کے تحفظ کے حوالے سے ایک اہم پہلو یہ ہے کہ خطرہ صرف ڈارک ویب تک براہ راست رسائی سے پیدا نہیں ہوتا، نقصان دہ افراد عام سوشل میڈیا، گیمز اور میسجنگ ایپس پر بھی بچوں سے رابطہ قائم کر سکتے ہیں اور انہیں دوسرے پلیٹ فارمز پر منتقل کر سکتے ہیں، اس لیے بچوں کی آن لائن حفاظت کو صرف کسی ایک ویب سائٹ یا ایپ کی نگرانی تک محدود نہیں رکھا جا سکتا۔
ضرورت اس بات کو سمجھنے کی ہے کہ بچے کن افراد سے رابطے میں ہیں، ان سے کس نوعیت کی گفتگو ہو رہی ہے اور آیا کوئی شخص انہیں خوف زدہ، بلیک میل یا نقصان دہ سرگرمیوں پر مجبور تو نہیں کر رہا۔
کراچی کے واقعہ میں سامنے آنے والی تفصیلات کے مطابق بچی کے سماجی میل جول میں کمی اور تنہائی اختیار کرنے جیسے رویے سامنے آئے، ایسے رویوں کی متعدد وجوہات ہو سکتی ہیں تاہم اگر ان کے ساتھ غیر معمولی رازداری، اچانک خوف، آن لائن رابطے چھپانے، دھمکیوں یا خود کو نقصان پہنچانے سے متعلق گفتگو بھی سامنے آئے تو والدین کو معاملے کو سنجیدگی سے لینا چاہیے۔
بچوں کو ڈانٹنے، شرمندہ کرنے یا ان کی آن لائن سرگرمیوں پر فوری پابندی لگانے کے بجائے ان سے پرسکون انداز میں بات کرنا ضروری ہے، اگر بچہ کسی نامعلوم شخص کے دباؤ، دھمکی یا خطرناک ٹاسک کے بارے میں بتائے تو اسے یقین دلایا جائے کہ مدد مانگنے پر اسے سزا نہیں دی جائے گی۔
والدین کو چاہیے کہ وہ بچوں کی عمر کے مطابق انٹرنیٹ کے استعمال کے اصول طے کریں، ان کی آن لائن سرگرمیوں میں دلچسپی لیں اور انہیں یہ سمجھائیں کہ کسی اجنبی کے کہنے پر اپنی تصویر، ویڈیو، ذاتی معلومات یا گھر کا پتا شیئر نہ کریں۔
ماہرین کے مطابق بچوں کی ڈیجیٹل حفاظت کے لیے والدین کی نگرانی، ڈیجیٹل لٹریسی اور اعتماد پر مبنی رابطہ بنیادی اہمیت رکھتے ہیں، والدین کو چاہیے کہ وہ بچوں کے زیر استعمال ڈیوائسز اور ایپس کی پرائیویسی سیٹنگز چیک کریں۔
عمر کے مطابق پیرنٹل کنٹرول استعمال کریں اور نامعلوم افراد کے پیغامات، رابطوں اور گیمز میں دستیاب چیٹ کی سہولت کے بارے میں بچوں کو آگاہ کریں، براؤزنگ ہسٹری اور ایپ کے استعمال کا جائزہ بھی لیا جا سکتا ہے لیکن نگرانی بچے کی عمر اور صورت حال کے مطابق ہونی چاہیے، صرف براؤزنگ ہسٹری چیک کرنا کافی نہیں کیونکہ آن لائن رابطے مختلف ایپس اور پلیٹ فارمز کے ذریعے بھی ہو سکتے ہیں، بچوں کو یہ بھی سکھانا ضروری ہے کہ وہ کسی مشکوک شخص کے کہنے پر لنک نہ کھولیں، ذاتی معلومات فراہم نہ کریں اور خطرناک ٹاسک قبول نہ کریں، اگر کوئی شخص دھمکی دے یا بچے کو کسی نقصان دہ سرگرمی پر مجبور کرے تو والدین کو متعلقہ پیغامات، صارف کا نام، اکاؤنٹ کی تفصیلات اور دیگر دستیاب شواہد محفوظ کرنے چاہییں تاہم غیر قانونی مواد کو آگے شیئر کرنے سے گریز کیا جائے۔
اگر بچے کو فوری خطرہ ہو تو اسے متعلقہ شخص سے دور کرکے محفوظ ماحول فراہم کرنا اولین ترجیح ہونی چاہیے، خود کو نقصان پہنچانے کی دھمکی یا فوری خطرے کی صورت میں بچے کو اکیلا نہ چھوڑا جائے اور فوری طور پر ہنگامی یا طبی مدد حاصل کی جائے۔
بچوں کو آن لائن خطرات سے محفوظ رکھنے کے لیے صرف والدین کی کوششیں کافی نہیں، حکومت، سائبر کرائم تحقیقاتی اداروں، تعلیمی اداروں، انٹرنیٹ سروس فراہم کرنے والوں اور ڈیجیٹل پلیٹ فارمز کو بھی اپنا کردار ادا کرنا ہوگا۔
این سی سی آئی اے اور دیگر متعلقہ اداروں کو ایسے کیسز کی بروقت تحقیقات، ڈیجیٹل شواہد کے مؤثر تجزیے اور مختلف پلیٹ فارمز کے درمیان قانونی تعاون کو بہتر بنانے کی ضرورت ہے، اگر کسی منظم نیٹ ورک کے ملوث ہونے کے شواہد ملیں تو اس کے منتظمین، بچوں سے رابطہ کرنے والے افراد اور ممکنہ متاثرین کی نشاندہی کے لیے مربوط کارروائی کی جانی چاہیے۔
حکام کو یہ بھی معلوم کرنا چاہیے کہ آیا ایسے نیٹ ورکس نے دوسرے بچوں کو بھی نشانہ بنایا ہے، اس مقصد کے لیے متاثرہ بچوں کی شناخت اور نجی معلومات کو محفوظ رکھتے ہوئے شکایات کا مؤثر نظام، خطرے کی تشخیص اور متاثرین کو نفسیاتی و سماجی مدد فراہم کرنا ضروری ہے، حکومت اور متعلقہ اداروں کو اسکولوں اور کالجوں میں ڈیجیٹل لٹریسی اور آن لائن تحفظ سے متعلق آگاہی پروگرام متعارف کرانے چاہییں۔