موجودہ حکومت جمہوریت کی آڑ میں مارشل لاء نافذ کیے ہوئے ہے، ترجمان جے یو آئی ف

اسلام آباد (قدرت روزنامہ)جمعیت علمائے اسلام ف کے ترجمان اسلم غوری نے قومی اسمبلی کے فلور پر پارٹی سربراہ مولانا فضل الرحمان کی تقریر کو بلیک آؤٹ کیے جانے کے واقعے پر شدید ردعمل کا اظہار کرتے ہوئے اسے عوام، پارلیمنٹ، جمہوریت اور آزادیِ اظہارِ رائے کی سنگین توہین قرار دیا ہے، انہوں نے دوٹوک الفاظ میں کہا کہ موجودہ حکمرانوں نے پارلیمنٹ کو ایک ڈمی ادارہ بنا کر رکھ دیا ہے اور نام نہاد جمہوری حکومت حقیقت میں آمریت کی لونڈی بن چکی ہے۔
ترجمان جے یو آئی ف اسلم غوری نے اپنے جاری کردہ سخت بیان میں سوال اٹھایا کہ اسمبلی کے اندر منتخب رہنماؤں کی تقریروں پر پابندی عائد کرنا، عام انتخابات میں مبینہ دھاندلی کے ریکارڈ قائم کرنا اور انتخابی مہم کے دوران تھریٹ لیٹرز جاری کرنے جیسے ہتھکنڈے دراصل اس ملک کو کس خطرناک سمت میں دھکیل رہے ہیں؟ موجودہ حکومت جمہوریت کا نقاب پہن کر درحقیقت پسِ پردہ مارشل لا کے نفاذ جیسے حربے استعمال کر رہی ہے، جو ملک و قوم کے ساتھ سراسر زیادتی ہے۔

جے یو آئی سربراہ مولانا فضل الرحمان کی اسمبلی فلور سے تقریر بلیک آؤٹ کرنا ،عوام، پارلیمنٹ ، جمہوریت، اور آزادی اظہار رائے کی توہین ہے ۔ترجمان جے یو آئی

پارلیمنٹ کو ڈمی بنادیا گیا،جمہوری حکومت آمریت کی لونڈی بن گئی ہے ۔اسلم غوری

اسمبلی میں تقریر پر پابندی ، انتخابات میں دھاندلی ،الیکشن کمپین کے وقت تھریٹ لیٹر ، آخر اس ملک کو کس طرف دھکیلا جا رہا ہے ؟ اسلم غوری

موجودہ حکومت جمہوریت کی آڑ میں مارشل لاء نافذ کئے ہوئے ہے۔اسلم غوری

ہمیں دیوار سےلگانےکی کوشش کرنےوالے نوشتہ دیوار بھی پڑھ لیں؟ اسلم غوری

آئین ،پارلیمنٹ ،آزادی اور جمہوریت کو کیوں بے توقیر کیا جارہا ہے ؟ ترجمان جےیوآئی

حکمران کیونکر اس لولی لنگڑی اندھی اور بہری جمہوریت کو دفن کرنے پر تلے ہوئے ہیں ؟ اسلم غوری

اگر انگریز کے ناجائز تسلط کو تسلیم نہیں کیا تو ان کے مہروں کا تسلط بھی کسی صورت تسلیم نہیں ۔ترجمان جے یوآئی

پارلیمنٹ کی بالادستی کا نعرہ لگانے والوں نے پارلیمنٹ کو مذاق بنا دیا ہے ۔اسلم غوری

معاملات اس حد تک نہ لے کر جائیں کہ کل کو حکمران منہ چھپاتے پھریں ۔ترجمان جےیوآئی

احسان فراموش حکمران مجبوری میں پاؤں پڑتے ہیں اور طاقت میں گریبان پکڑتے ہیں ۔اسلم غوری

ووٹ کو عزت دو کے نعرے لگانے والوں نے جمہوری روایات اور اقدار کو بھی دفن کردیا ہے ۔ ترجمان جےیوآئی

میڈیا سیل جے یو آئی پاکستان

— Jamiat Ulama-e-Islam Pakistan (@juipakofficial) October 28, 2026

انہوں نے حکمرانوں کوتبدیلی اور مزاحمت کا انتباہ دیتے ہوئے کہا کہ جے یو آئی کو دیوار سے لگانے کی کوشش کرنے والے عناصر کو چاہیے کہ وہ دیوار پر لکھا ہوا واضح پڑھ لیں، آخر کس مجبوری کے تحت آئین، پارلیمنٹ، آزادی اور جمہوریت کو اس قدر بے توقیر کیا جا رہا ہے؟ حکمران کیوں کر اس لولی، لنگڑی، اندھی اور بہری جمہوریت کو مکمل طور پر دفن کرنے کے درپے ہیں، اگر ہمارے اکابرین نے انگریز کے ناجائز تسلط کو کبھی تسلیم نہیں کیا تھا، تو آج کے ان مقامی حکمرانوں اور مہروں کا تسلط بھی کسی صورت قبول نہیں کیا جائے گا۔
ترجمان جے یو آئی ف نے مسلم لیگ ن پر تنقید کرتے ہوئے کہا کہ جو لوگ ہمیشہ ووٹ کو عزت دو کے بلند و بانگ نعرے لگاتے رہے ہیں، انہوں نے اقتدار میں آتے ہی تمام جمہوری روایات اور اقدار کو اپنے ہاتھوں سے دفن کر دیا اور پارلیمنٹ کی بالادستی کے نعرے کو محض ایک مذاق بنا دیا، معاملات کو اس نہج پر نہ لے کر جائیں کہ کل کو انہیں چھپنے کے لیے بھی جگہ نہ ملے، احسان فراموش حکمران ہمیشہ مجبوری کے وقت آ کر پاؤں پڑتے ہیں اور طاقت ملتے ہی عوام اور اتحادیوں کے گریبان پکڑنے لگتے ہیں، لیکن جے یو آئی اس روش کو مزید برداشت نہیں کرے گی اور آئین و جمہوریت کے تحفظ کے لیے ہر حد تک جائے گی۔