حرمین شریفین کی سکیورٹی، جدید ٹیکنالوجی اور اے آئی سے نگرانی کا نظام


ریاض: حرمین شریفین کی سکیورٹی کو مؤثر بنانے کے لیے سعودی عرب میں جدید ٹیکنالوجی، مصنوعی ذہانت اور ڈیجیٹل نگرانی کے نظام سے مدد لی جارہی ہے تاکہ لاکھوں زائرین کی آمدورفت کو محفوظ اور منظم رکھا جاسکے۔
سعودی پریس ایجنسی کی خصوصی رپورٹ کے مطابق مسجد الحرام اور مسجد نبوی ﷺ کی سکیورٹی کا نظام وقت کے ساتھ مسلسل ترقی کرتا رہا ہے۔ بانی مملکت شاہ عبدالعزیز کے دور سے حرمین شریفین کی دیکھ بھال میں سکیورٹی کو بنیادی اہمیت دی گئی اور پولیس و دیگر سکیورٹی اداروں کی تربیت کے لیے باقاعدہ نظام تشکیل دیا گیا۔
رپورٹ کے مطابق وقت کے ساتھ مکہ مکرمہ اور مدینہ منورہ میں توسیعی منصوبوں، سڑکوں، مواصلاتی نظام اور دیگر بنیادی ڈھانچے کی ترقی کے ساتھ زائرین کی بڑھتی ہوئی تعداد کے پیش نظر سکیورٹی اور انتظامی خدمات کا دائرہ بھی وسیع کیا گیا۔
موجودہ دور میں حرمین شریفین کی سکیورٹی صرف روایتی نگرانی تک محدود نہیں رہی بلکہ مصنوعی ذہانت اور ڈیٹا کے تجزیے سمیت جدید ٹیکنالوجی کو بھی سکیورٹی اور ہجوم کے انتظام میں استعمال کیا جارہا ہے۔ سعودی وزارت داخلہ نے 2026 میں بھی حجاج اور عمرہ زائرین کی حفاظت اور ہجوم کے انتظام کے لیے مصنوعی ذہانت پر مبنی مختلف نظاموں کے استعمال کو اجاگر کیا ہے۔
سعودی پریس ایجنسی کے مطابق حج 1447 ہجری کے دوران سواہر پلیٹ فارم کے ذریعے 80 مقامات پر 5 ہزار سے زائد کیمروں سے نگرانی کی گئی، جبکہ 16 مصنوعی ذہانت کے الگورتھمز اور 31 ڈیٹا ڈیش بورڈز بھی استعمال کیے گئے۔ اس نظام کے ذریعے ہجوم کی نقل و حرکت کا حقیقی وقت میں تجزیہ کرکے متعلقہ اداروں کو فوری فیصلوں میں مدد فراہم کی گئی۔
اسی طرح بصیر پلیٹ فارم مصنوعی ذہانت اور کمپیوٹر وژن ٹیکنالوجی کے ذریعے ہجوم کی نگرانی، ممکنہ واقعات کی پیشگی نشاندہی اور گمشدہ افراد کی تلاش میں مدد فراہم کرتا ہے۔ سعودی حکام کے مطابق اس ٹیکنالوجی سے زیادہ رش والے مقامات پر انتظامات بہتر بنانے اور ضرورت کے مطابق وسائل بروقت پہنچانے میں مدد ملتی ہے۔
حرمین شریفین اور مقدس مقامات کی سکیورٹی میں مختلف اداروں کے درمیان رابطہ بھی اہم کردار ادا کرتا ہے۔ سکیورٹی اداروں کے ساتھ صحت، ٹرانسپورٹ، شہری خدمات اور ہنگامی امداد سے متعلق محکمے مل کر زائرین کی حفاظت اور سہولت کے لیے کام کرتے ہیں۔ سعودی وزارت داخلہ کے مطابق ہجوم کے انتظام کے لیے مصنوعی ذہانت کے نظام کے ساتھ متحدہ سکیورٹی آپریشنز مراکز اور دیگر ڈیجیٹل سہولیات بھی استعمال کی جارہی ہیں۔
اس جدید نظام کا مقصد صرف سکیورٹی کی نگرانی نہیں بلکہ زائرین کی نقل و حرکت کو بہتر انداز میں منظم کرنا، ہجوم کے دباؤ کی بروقت نشاندہی کرنا اور ہنگامی صورتحال میں فوری ردعمل کو یقینی بنانا ہے۔ جدید ٹیکنالوجی کے استعمال سے حجاج اور عمرہ زائرین کو زیادہ محفوظ اور منظم ماحول فراہم کرنے کی کوشش کی جارہی ہے۔

WhatsApp
Get Alert