’ایمان اندرونی تبدیلی کا نام ہے‘، ڈراما ‘درِ نجات’ کے متنازع سین پر اداکارہ درِفشاں سلیم کی وضاحت

لاہور(قدرت روزنامہ)مقبول ڈراما سیریل ‘درِ نجات’ کی تازہ قسط کے ایک منظر نے سوشل میڈیا پر ایک نیا مباحثہ چھیڑ دیا ہے، جس میں مرکزی کردار ‘زیریاب حبیب’ (درِفشاں سلیم) یہ کہتے ہوئے سلیو لیس (بغیر آستین کا) لباس پہننے سے انکار کر دیتی ہے کہ وہ اب ایسے کپڑوں میں خود کو آرام دہ محسوس نہیں کرتی۔ اس بحث کے سامنے آنے کے بعد اب خود اداکارہ درِفشاں سلیم نے بھی اس پر اپنا موقف پیش کر دیا ہے۔

اتوار کے روز انسٹاگرام پر شیئر کی گئی ایک پوسٹ میں اداکارہ نے وضاحت کی کہ اس منظر کا بنیادی مقصد زیریاب کے ایمان اور عقیدے کے ساتھ بدلتے ہوئے تعلق کو دکھانا تھا، اور اسے اس اندرونی تبدیلی سے گزرنے کی مکمل آزادی ہونی چاہیے۔

درِفشاں سلیم نے کہا کہ ان کے نزدیک ایمان ایک اندرونی ارتقاء کا نام ہے جو ظاہر میں انسان کے افعال اور اس کے لباس کے انتخاب کے ذریعے سامنے آتا ہے۔ انہوں نے اس بات پر زور دیا کہ عورت کے اپنے لباس کا انتخاب کرنے کے حق کا احترام تمام خواتین کے لیے، چاہے ان کا طرزِ لباس کچھ بھی ہو، یکساں طور پر ہونا چاہیے۔

اداکارہ کے مطابق اصل مسئلہ یہ نہیں کہ زیریاب نے کیا پہننے کا انتخاب کیا، بلکہ اصل مسئلہ یہ ہے کہ لوگ اس کے انتخاب کا احترام کرنے کے بجائے اس پر سوال اٹھانے، اس کا باریک بینی سے جائزہ لینے اور اس پر فیصلے صادر کرنے لگتے ہیں۔

انہوں نے کہا کہ ڈراما ‘درِ نجات’ دراصل زیریاب کی کہانی ہے، جس میں ایک عورت کے طور پر اس کی خامیاں، کمزوریاں اور تضادات شامل ہیں، اور شائقین اس پر اپنی رائے رکھنے کا پورا حق رکھتے ہیں۔

تاہم، انہوں نے کسی کہانی کے ایک جزو کو ضرورت سے زیادہ ہوا دینے اور اسے ’قومی ہنگامی صورتحال‘ بنانے کی منطق پر سوال اٹھایا۔ ان کا کہنا تھا ’ہر کردار کے ارتقاء کے لیے پینل ڈسکشن، جیوری تشکیل دینے یا انٹرنیٹ سے حتمی فیصلے صادر کروانے کی ضرورت نہیں ہوتی۔‘

انہوں نے مزید کہا ’ضروری نہیں کہ آپ زیریاب سے اتفاق کریں، یا اس سے کوئی ذاتی تعلق محسوس کریں، اور نہ ہی یہ لازم ہے کہ آپ اس کے سفر کو اپنا سفر بنائیں۔ بعض اوقات، یہ صرف کسی اور کی کہانی ہوتی ہے۔‘

اپنے کردار کے برعکس گفتگو کرتے ہوئے انہوں نے بتایا کہ وہ خود سلیو لیس لباس پہننے میں بالکل آرام دہ ہیں اور کافی عرصے سے ایسا پہنتی آ رہی ہیں۔ انہوں نے کہا ’پارسائی اور حیا کے ساتھ یہ میرا اپنا ذاتی تعلق ہے، اور کسی دوسرے کا تعلق اس سے بالکل مختلف ہو سکتا ہے۔‘

ان کا کہنا تھا کہ ان کا ایمان انہیں کسی دوسرے پر تنقید یا فیصلہ صادر کرنے کا حق نہیں دیتا، اور نہ ہی کسی اور کے پاس یہ حق ہے کہ وہ ان کے بارے میں کوئی فیصلہ کرے۔ انہوں نے دہرایا کہ وہ کیا پہننا چاہتی ہیں، کس چیز میں آرام دہ ہیں اور اپنے اندر کیا تبدیلی لاتی ہیں، یہ مکمل طور پر ان کا ذاتی معاملہ ہے۔