کیا آپ بادام کھانے کے بہترین اور فائدہ مند طریقے جانتے ہیں؟

اسلام آباد (قدرت روزنامہ)ہلکی پھلکی بھوک میں کچھ اور کھانے سے کہیں زیادہ بہتر ہے کہ بادام کھا لیا جائے کیونکہ بادام نہ صرف جسمانی توانائی میں اضافہ کرتا ہے بلکہ متعدد ایسے طبی مسائل سے بھی حل کرتا ہے جن سے چھٹکارے کے لیے اکثر افراد مہنگی ترین دوائیاں استعمال کرتے دکھائی دیتے ہیں- بادام ایک انتہائی صحت بخش غذا ہے کیونکہ اس سے انسانی جسم کو وٹامن ای، غذائی فائبر، میگنیشم، کاپر، زنک، آئرن، پوٹاشیم اور کیلشیئم سمیت 15 غذائی اجزاء حاصل ہوتے ہیں . بادام کی اہمیت کو مدنظر رکھتے ہوئے ہم یہاں بادام کے طریقہ استعمال اور اس سے متعلقہ چند ایسی باتوں کا ذکر کر رہے ہیں جو یقیناً قارئین کے لیے انتہائی فائدہ مند ثابت ہوں گی-

بادام کے استعمال کا بہترین طریقہ
بادام کے طریقہ استعمال کی کوئی قید نہیں ہے کیونکہ اس کا ہر انداز میں استعمال بہترین اور فائدہ مند ثابت ہوتا ہے- تاہم مندرجہ ذیل میں موجود چند مخصوص طریقہ کار اختیار کر کے آپ اہم ترین فوائد حاصل کرسکتے ہیں- البتہ یاد رہے کہ بادام سمیت کسی بھی غذا کا بہت زیادہ استعمال نقصان دہ ثابت ہوسکتا ہے- اس لیے اعتدال کے ساتھ کھائیے اور نقصان کے بجائے فائدہ اٹھائیے-

یادداشت کی تیزی کے لیے بادام بھگو کر کھائیں
روزانہ 8 سے 10 بادام رات کو پانی میں بھگو کر رکھ دیں اور صبح اٹھ کر کھالیں- یہ عمل آپ کی یادداشت کو تیز بناتا ہے- درحقیقت اس طریقے سے بادام کھانے سے آپ کے دماغ کے وہ خلیات صحتیاب ہوجاتے ہیں جو کسی وجہ سے خرابی کا شکار ہوچکے ہوتے ہیں اور یادداشت کی کمزوری کا باعث بن رہے ہوتے ہیں-

باداموں کو فریج میں رکھنا نقصان دہ تو نہیں؟
اکثر لوگوں کا ماننا ہے کہ باداموں کو فریج میں رکھنے سے ان کی غذائیت کم ہوجاتی ہے یا یہ صحت بخش نہیں رہتے- لیکن یہ حقیقت نہیں ہے٬ بلکہ باداموں فریج میں رکھ کر ایک طویل عرصے تک قابلِ استعمال بنایا جاسکتا ہے اور جب چاہیں ان سے طبی فائدہ اٹھایا جاسکتا ہے-

کیا بادام روز کھانا چاہیے؟
جی ہاں اعتدال میں رہ بادام کی چند گریاں روز ضرور کھانی چاہیے کیونکہ ماہرین اسے انتہائی مفید قرار دیتے ہیں- ماہرین کا کہنا ہے کہ بادام نہ صرف دل کو طاقتور بناتا ہے بلکہ جسم میں کولیسٹرول کی سطح کو بھی کر دتا ہے- اس کے علاوہ بادام میں پائے جانے والے چند مخصوص غذائی اجزاﺀ ذیابیطیس لاحق ہونے کے خطرات کو بھی کم کرتے ہیں-

بادام کا چھلکا بھی قیمتی فوائد کا مالک
کوشش کیجیے کہ بادام کو چھلکے سمیت کھائیے کیونکہ یہ چھلکا بھی متعدد ایسے قیمتی فوائد کا مالک ہوتا ہے جس بیشتر افراد ناواقف ہوتے ہیں- اس چھلکے میں پولی فینولز کی بھاری مقدار پائی جاتے ہیں جو اسے ریشے سے بھرپور میوہ بنانے میں مددگار ثابت ہوتی ہے-

سردیوں اور گرمیوں میں بادام کا استعمال
سردیوں میں اگر بادام کا حلوہ بنا کر کھایا جائے تو نزلہ اور زکام سے بچا جاسکتا ہے جبکہ گرمیوں میں بادام کا شربت پینے سے آپ سر درد سے محفوظ رہ سکتے ہیں-

.