فیاض چوہان نے شہباز اور ترین ملاقات کی تصدیق کردی

لاہور (قدرت روزنامہ)وزیر جیل خانہ جات پنجاب فیاض الحسن چوہان نے تصدیق کی ہے کہ دو دن پہلے مسلم لیگ ن کے صدر شہباز شریف کی جہانگیر ترین سے ملاقات مخدوم احمد محمود کی رہائش گاہ پر ہوئی ہے .
فیاض الحسن چوہان نے اپنے ایک بیان میں کہا کہ جہانگیر ترین، پارٹی کے سیکریٹری جنرل تھے، اپنی ذمہ داری بہتر طریقے سے نبھائی ، انہیں زندگی میں کبھی آل شریف سے خیر نہیں مل سکتا، شہباز شریف وہ شخص ہیں جن کے ہاتھ میں فیصلے کی قوت ہی نہیں ہے .

صوبائی وزیر نے کہا کہ چوہدری نثار اور شہباز شریف دونوں فیصلہ کرنے کی قوت ہی نہیں رکھتے . فیاض چوہان نے مشورہ دیتے ہوئے کہا کہ جہانگیر ترین صاحب کبھی بھی آل شریف اور شہباز شریف پر بھروسہ نہ کیجئے گا .
فیاض چوہان نے کہا کہ جہانگیر ترین حالات اور واقعات دیکھ کر فیصلہ کریں . ان کا کہنا تھا کہ حکومت کیخلاف کوئی تحریک عدم اعتماد نہیں آئے گی ، ان کو پتہ ہی نہیں کہاں تحریک عدم اعتماد آئے گی، ان کے 15 ارکان اسمبلی پنجاب میں ہم سے ٹکٹ مانگ رہے ہیں .
صوبائی وزیر کا مزید کہنا تھا کہ حمزہ شہباز اپنے ارکان اسمبلی کے ذریعے چوہدری برادران کو گالیاں دیتے تھے . دوسری جانب ترجمان جہانگیر ترین گروپ سعید اکبر نورانی کاکہنا ہے کہ پہلے بھی پارٹی کے ہر فیصلے کی تائید کی ہے، ہم تو کبھی تحریک انصاف سے الگ ہوئے ہی نہیں، ہم نے جہانگیر ترین کا ساتھ دیا، عمران خان نے ہماری بات سنی .
سعید اکبر نورانی کاکہنا تھا کہ جہانگیر ترین والے معاملے میں ہماری بات میرٹ پر تھی،پہلے بھی پارٹی کے ساتھ تھے اور آج بھی پارٹی کے ساتھ ہی ہیں . واضح رہے کہ چند روز قبل باخبر ذرائع نے دی نیوز کو بتایا تھا کہ اپوزیشن لیڈر اور ن لیگ کے صدر شہباز شریف نے پی ٹی آئی کے ناراض رہنما جہانگیر خان ترین سے خفیہ ملاقات کی ہے .
باخبر ذرائع کے مطابق ملاقات میں دونوں رہنماؤں نے عمران خان حکومت اور اسکی قسمت کے حوالے سے بات چیت کی، جبکہ رابطہ کرنے پر جہانگیر ترین نے اپوزیشن کی جانب سے وزیراعظم عمران خان کیخلاف عدم اعتماد کی تحریک لانے کے تناظر میں اس اہم ترین ملاقات کے حوالے سے کوئی موقف نہیں دیا تھا .