امریتا راؤ کا دو سال تک شادی خفیہ رکھنے کا انکشاف

اسلام آباد (قدرت روزنامہ)بالی ووڈ اداکارہ امریتا راؤ نے انکشاف کیا ہے کہ انہوں نے شوہر انمول سے 2014 میں شادی کی تھی لیکن اسے منظرِ عام پر 2016 میں لائیں۔جوڑے کے یوٹیوب شو ’کپل آف تھنگز‘ کی تازہ ترین قسط میں امریتا اور انمول نے انکشاف کیا کہ ہم نے 2014 میں خفیہ طور پر شادی کی، تاہم اس کا اعلان 2016 میں کیا۔
انہوں نے ویڈیو میں وضاحت کی کہ اگرچہ انمول نے انہیں چند بار پرپوز کیا، لیکن امریتا ہر بار پیشکش کو ٹھکرا دیتی تھیں۔امریتا راؤ کا خیال تھا کہ اگر وہ بروقت اپنی شادی کا اعلان کر دیتیں تو ان کے کیرئیر کے تباہ ہونے کا خدشہ تھا کیونکہ بالی ووڈ میں شادیوں کے بعد کیرئیر بےحد متاثر ہوتے ہیں۔
بالی ووڈ اداکارہ نے کہا کہ آج کے دور میں سوشل میڈیا کا استعمال بہت زیادہ ہے جہاں ہم اپنے خیالات کا بخوبی اظہار کرتے ہیں لیکن جب میری شادی ہوئی تو اُس وقت سوشل میڈیا کی طرف لوگوں کا زیادہ رجحان نہیں تھا۔
اُنہوں نے کہا کہ اُس وقت افواہیں پھیلانا بہت آسان تھا اور پھر اُن افواہوں پر ردّعمل دینا بہت مشکل تھا لہٰذا ہم نے دو سال تک اپنی شادی خفیہ رکھی۔
امریتا راؤ نے کہا کہ اُن کے شوہر انمول نے پھر مشورہ دیا کہ وہ رازداری میں شادی کریں گے جس کے بعد وہ شادی کے لیے راضی ہوئیں۔انہوں نے 15 مئی 2014 کو قریبی رشتے داروں کی موجودگی میں شادی کی تھی لیکن اُنہوں نے سال 2016 میں اپنی شادی کا اعلان کیا تھا اور سال 2020 میں اُن کے ہاں بیٹے کی پیدائش ہوئی۔