عمران خان نے الیکشن سے قبل عوام سے کچھ زیادہ بڑے وعدے کرلئے تھے، شاہد آفریدی

اسلام آباد (قدرت روزنامہ)پاکستان کرکٹ ٹیم کے سابق کپتان شاہد آفریدی نے پاکستان کی موجودہ صورتحال پر کہا کہ عمران خان نے الیکشن سے قبل عوام سے کچھ زیادہ بڑے وعدے کرلئے تھے .
کشمیر پریمئیر لیگ روڈ شو کے موقع پر شاہد آفریدی نے میڈیا سے گفتگو کرتے ہوئے کہا کہ عمران خان کو بڑے وعدے پورے کرنے کیلئے 10 سے 15 برس چاہیئے، ایسی بات نہیں کہ ان کی حکومت نے کچھ نہیں کیا، ان کی ٹیم اپنے کاموں کے بارے میں بتا نہیں پارہی ہے .

آل راؤنڈر شاہد آفریدی نے کہا کہ عمران خان نے الیکشن سے قبل عوام سے کچھ زیادہ بڑے وعدے کرلئے تھے، انہیں معقول ہوم ورک اور مخلص ٹیم کے ساتھ حکومت میں آنا چائیے تھا .

A pleasure meeting His Excellency Moazzam Ahmad Khan at the inauguration of Kashmir Premier League, Season 2. My best wishes for the upcoming event 🇵🇰 pic.twitter.com/NlKjW28WON

— Shahid Afridi (@SAfridiOfficial) March 10, 2022

انہوں نے مزید کہا کہ میں نہیں کہوں گا کہ سیاست میں نہیں آؤں گا، تاکہ یوٹرن کا الزام نہ لگے . شاہد آفریدی نے کہا کہ حکومت فوج کے ساتھ مل کر ملک کی ترقی کیلئے کام کرے، پاکستان میں ہر کام میں فوج کیوں شمولیت اختیار کرتی ہے، حکومت کے کام اُسے خود کرنے چاہئیں .
شاہد آفریدی نے کہا کہ کے پی ایل کا حکومت کی تبدیلی سے کوئی تعلق نہیں ہونا چائیے، کشمیر پریمئیر لیگ کے میچز کا برطانیہ میں ہونا خوش آئند ہوگا . انہوں نے کہا کہ کے پی ایل کے ذریعے دنیا کو یہ پیغام گیا کہ کشمیر کے لوگ پرامن اور محنت کرنے والے لوگ ہیں .
شاہد آفریدی نے میڈیا سے گفتگو کرتے ہوئے مزید کہا کہ کے پی ایل میں دو نئی فرنچائز کی شمولیت اس کی مقبولیت کی دلیل ہے، کے پی ایل کا ٹیلنٹ پی سی ایل اور پاکستان ٹیم کا حصہ بنے گا .
دوسری جانب سماجی رابطے کی ویب سائٹ ٹوئٹر پر شاہد آفریدی نے لکھا کہ کشمیر پریمئیر لیگ سیزن ٹو کے افتتاح کے موقع پر ہائی کمشنر معظم احمد خان سے مل کر خوشی ہوئی . شاہد آفریدی نے کشمیر پریمئیر لیگ کے حوالے سے نیک خواہشات کا اظہار بھی کیا .