پی ڈی ایم کا لانگ مارچ؛ جے یو آئی کے قافلے اسلام آباد کی جانب رواں دواں

کراچی (قدرت روزنامہ)اپوزیشن اتحاد پی ڈی ایم کے لانگ مارچ میں شرکت کے لئے کراچی سے جے یو آئی (ف) کے رہنماؤں اور کارکنوں کا قافلہ روانہ ہوگیا ہے۔جے یو آئی (ف) کی جانب سے جاری شیڈول کے مطابق کراچی کے علاقے سہراب گوٹھ سے قافلہ اسلام آباد کے لئے روانہ ہوگا۔
شیڈول کے مطابق بلوچستان سے بڑا قافلہ 25 مارچ کو روانہ ہوگا جس میں ارکان قومی و صوبائی اسمبلی اور سینیٹرز کے علاوہ پارٹی کی قیادت اور کارکنوں کی بڑی تعداد شامل ہوگی۔
مولانا فضل الرحمان کی قیادت میں ڈیرہ اسماعیل خان سے قافلہ 26 مارچ کو روانہ ہوگا۔ شیڈول میں بتایا گیا ہے کہ تمام قافلے 26 مارچ کی شام اسلام آباد میں داخل ہوں گے اور سری نگر ہائی وے جی نائن پر جمع ہوں گے۔
اپوزیشن کے سیاسی رہنماؤں اور کارکنوں کا پڑاؤ اسلام کے سیکٹر جی نائن اور ایچ نائن کے درمیان ہوگااور دھرنا بھی اسی مقام پر دیا جائے گا۔پی ڈی ایم نے اسلام آباد میں جلسے اور دھرنے کے لئے انتظامیہ سے 10 روزہ پڑاؤ کی تحریری اجازت بھی مانگ لی ہے۔