گورنر پنجاب عمر سرفراز شرافت سے گھر چلے جائیں اور اپنی عزت مزید خراب نہ کریں : رانا ثناءاللہ
اسلام آباد(قدرت روزنامہ) وفاقی وزیر داخلہ رانا ثناءاللہ خان نے صدر عارف علوی اور گورنر پنجاب عمرسرفراز چیمہ کوخبردار کرتے ہوئے کہا چند گھنٹوں کے گورنر موصوف شرافت سے گھر چلے جائیں اور اپنی عزت مزید خراب نہ کریں توبہتر ہوگا، صدر عارف علوی اور گورنر پنجاب عمر چیمہ ایسا کوئی کام نہ کریں کہ تاریخ اور عوام آپ پر تھو تھو کرتی رہے .
تفصیلات کے مطابق انہوں نے کہا کہ صدر مملکت عارف علوی وزیراعظم شہباز شریف کی ایڈوائس کے پابند ہیں، اس سے ہٹنا آئین شکنی ہوگی، صدر مملکت اور گورنر پنجاب آئین اور سپریم کورٹ کے حکم پر چلیں، کسی بھی خلاف ورزی سے باز رہیں .
رانا ثنا کا کہنا تھا کہ سپریم کورٹ قرار دے چکی ہے صدر کے پاس کوئی ’اِن ہیرنٹ‘ یا ’ریذیڈیول‘ پاورز نہیں، پارلیمانی جمہوریت میں صدر کا منصب علامتی ہوتا ہے، ا±ن کے پاس ’ویٹو‘ کا اختیار نہیں، ایوان صدر پی ٹی آئی سیکریٹریٹ نہیں، عمران خان کے غلام نہ بنیں، آئین پر چلیں .
رانا ثنا نے مزید کہا کہ عمرچیمہ جاتے جاتے کوئی نیا گند گھولنے سے باز رہیں اور شرافت سے گھر چلے جائیں، آئین سے ہٹنے والوں کو آئین، عدالت اور عوام کی سزا کے لئے تیار رہنا ہوگا .
