سیاست کا حصہ بننے کے بعد ارمیلا ماٹونڈکر کو کن مشکلات کا سامنا کرنا پڑا؟
ممبئی(قدرت روزنامہ) بالی ووڈ کی مشہور اداکارہ ارمیلا ماٹونڈکر کا شمار ان اسٹارز میں کیا جاتا ہے جو سیاست میں نہ صرف گئے بلکہ باقاعدہ انتخابات میں بھی حصہ لیا۔
تاہم شوبز سے سیاست کی جانب سفر کے دوران ارمیلا کے ساتھ کیا واقعات پیش آئے اور انہیں کن مشکلات کا سامنا کرنا پڑا حال ہی میں اداکارہ نے اس پر کھل کر گفتگو کی ہے۔
ارمیلا کا کہنا تھا کہ جب انہوں نے سیاست میں جانے کا فیصلہ کیا تھا اس کو بہت سے لوگوں نے ’عجیب نظر‘ سے دیکھا تھا، سیاست میں جاتے ہی ان کے بارے میں عجیب عجیب تبصرے شروع ہو گئے کہ جن کو سن کر حیرت ہوتی تھی جبکہ ایسے تبصروں کا سلسلہ اب تک بھی جاری ہے۔
View this post on Instagram
ان کا کہنا تھا کہ شاید ایسا اس لئے ہوا کہ وہ اداکارہ ہیں خوبصورت اور گلیمرس بھی ہیں اس لئے لوگ سمجھتے ہیں کہ وہ گونگی اور سوچنے سمجھنے کی صلاحیت سے عاری ہیں اور سیاست کا حصہ نہیں بن سکتی کیونکہ ایک اداکارہ ہیں۔
ارمیلا نے کہا کہ اگر آپ ایک مرد اداکار ہیں تو ہو سکتا ہے آپ کے ساتھ ایسا نہ ہو۔ ارمیلا ماٹونڈکر نے یہ بھی بتایا کہ میڈیا جس انداز میں ان کی الیکشن مہم کو کور کرتا تھا وہ خود اسی کا مذاق اڑانے کے لیے کافی تھا جبکہ آج بھی حالات میں کچھ زیادہ تبدیلی نہیں آئی۔
انہوں نے سیاست میں حصہ لینے والی دیگر خواتین کا حوالہ دیتے ہوئے کہا کہ ’ان کو بھی ایسی صورت حال کا سامنا رہا تاہم مجھے زیادہ اس لیے کرنا پڑا اور میرے خیال میں اس کی وجہ یہ ہے کہ میرا تعلق شوبز سے تھا اور میں خاتون ہوں۔‘
View this post on Instagram
ارمیلا نے بتایا کہ ان کے شوہر جوکہ ایک مسلمان بزنس مین ہیں انہوں نے سیاست میں جانے کے بعد سے لے کر اب تک ان کا ہرقدم پر ساتھ دیا جو کہ ان کے لیے حیران کن تھا۔
یاد رہے کہ شوبز سے دوری اختیار کرنے کے بعد ارمیلا ماٹونڈکر نے 2019 میں انڈین نیشنل کانگریس میں شمولیت اختیار کی تھی اور اسی سال ہی لوک سبھا کے انتخابات میں حصہ لیا تھا۔
تاہم الیکشن ہارنے کے بعد اسی سال انہوں نے کانگریس سے استعفٰی دے دیا تھا اور دسمبر 2020 میں شیو سینا کا حصہ بن گئی تھیں، اب جلد ہی اداکارہ ایک بھارتی ٹی وی ریئلٹی شو ’ڈانس انڈیا ڈانس سپر مومز‘ میں بطور جج فرائص نبھاتی نظر آئیں گی۔