پاکستان میں سیلاب: برطانوی صحافی کو بالی ووڈ انڈسٹری کی خاموشی پر افسوس

اسلام آباد (قدرت روزنامہ)برطانوی نشریاتی ادارے کے صحافی ہارون رشید نے پاکستان میں مون سون بارشوں اور سیلاب کی تباہ کاریوں پر بالی ووڈ انڈسٹری کی خاموشی پر افسوس کا اظہار کیا ہے۔پاکستان میں مون سون بارشوں اور سیلاب کی وجہ سے اب تک 1 ہزار سے زائد لوگ جاں بحق جبکہ 3 کروڑ 30 لاکھ سے زائد لوگ بے گھر ہو چکے ہیں۔پاکستانی حکومت اور سیلاب زدگان کے لیے دنیا بھر سے مشہور شخصیات تعاون کر رہی ہیں۔
پاکستان کے پڑوسی ملک بھارت کی مقبول ترین فلم انڈسٹری کی کسی بھی نامور شخصیت کی جانب سے تعاون تو بہت دور کی بات ہے، اب تک افسوس کا اظہار بھی نہیں کیا گیا ہے۔اس حوالے سے برطانوی نشریاتی ادارے کے صحافی ہارون رشید نے مائیکرو بلاگنگ ویب سائٹ ٹوئٹر پر بھارتی فنکاروں کے پاکستان کے سیلاب زدگان کے لیے اس غیر اخلاقی روّیے پر افسوس کا اظہار کیا ہے۔

I genuinely thought humanity knows no borders but it’s telling that hardly any Bollywood stars have posted about the devastating floods in Pakistan – raise awareness, share links, just show sympathy. They know how popular they are and how much that acknowledgement would mean.💔

— Haroon Rashid (@iHaroonRashid) September 1, 2022

اُنہوں نے اپنے ٹوئٹ میں لکھا ہے کہ میرا خیال تھا کہ انسانیت کی کوئی سرحد نہیں ہوتی لیکن یہاں تو شاید ہی کسی بالی ووڈ اسٹار نے پاکستان میں تباہ کن سیلاب کے بارے میں افسوس کا اظہار کیا ہو۔
اُنہوں نے افسوس کا اظہار کرتے ہوئے لکھا ہے کہ سب فنکار اس بات سے باخوبی واقف ہیں کہ وہ کتنے مشہور ہیں اور متاثرین کے لیے ان کے آواز اُٹھانے سے کتنا فرق پڑے گا۔