شدید سردی میں عوام کو گیس کی عدم فراہمی محکمہ گیس کی نااہلی ہے، بی این پی

کوئٹہ (قدرت روزنامہ)بلوچستان نیشنل پارٹی کے ممبر سنٹرل ایگزیکٹیو کمیٹی و ضلعی صدر کوئٹہ غلام نبی مری، جنرل سیکریٹری میر جمال لانگو اور انفارمیشن سیکریٹری نسیم جاوید ہزارہ نے اپنے ایک بیان میں محکمہ گیس کی ناقص منصوبہ بندی اور نا اہلی کو شدید تنقید کا نشانہ بناتے ہوئے کہا ہے کہ کوئٹہ کی یخ بستہ دنوں اور سرد راتوں میں گیس کی لوڈ شیڈنگ کرانا عوام دشمنی کا منہ بولتا ثبوت ہے۔ محکمہ گیس کی اس ناقص منصوبہ بندی سے عوام شدید مشکلات اور پریشانیوں کا سامنا کر رہے ہیں جو کہ قابل مذمت ہے۔ اس پر ہوشربا اور ناجائز بل بھیجنا سراسر ظلم کے مترادف ہے۔
ایک جانب گیس ناپید ہے اور دوسری طرف کم یونٹ استعمال کرنے والوں پر میٹر بند ہونے کا الزام لگا کر ہزاروں روپے کا بل جرمانے کے مد میں بھیجے جاتے ہیں جب اس کی شکایت کی جاتی ہے تو میٹر کی تبدیلی کا حکم ملتا ہے اور عوام لائن میں لگ کر میٹر کی تبدیلی کی درخواست دیتے ہیں مگر محکمہ کے پاس نئے میٹرز بھی دستیاب نہیں ہوتے ہیں۔
اس ناقص منصوبہ بندی سے عوام شدید ذہنی کوفت میں مبتلا ہیں۔ انہوں نے حکومت اور محکمہ گیس کے اعلی حکام سے مطالبہ کیا ہے کہ وہ عوام دشمنی کے اس روش کو فورا ترک کر کے عوام کو مشکلات سے نجات دلا دے۔ انہوں نے خبردار کرتے ہوئے کہا ہے کہ بی این پی عوام کی تکالیف اور پریشانیوں پر ہرگز خاموش نہیں رہے گی اگر یہ ظالمانہ روش بند نہیں کی گئی تو ہمارے پاس عوام کے ساتھ سڑکوں پر نکلنے اور احتجاج کرنے کے علاوہ کوئی راستہ نہیں بچتا ہے۔ بی این پی ہر وقت عوام کے دکھ درد اور تکالیف پر آواز اٹھائی ہے اور آواز اٹھاتی رہے گی۔