بانی ایم کیو ایم کا تقاریر پر پابندی کے خلاف سندھ ہائیکورٹ سے رجوع

کراچی(قدرت روزنامہ)بانی ایم کیو ایم نے سندھ ہائیکورٹ سے رجوع کرتے ہوئے نمائندگی کیلیے 2 مقامی وکلاء کو نامزد کردیا، عدالت نے درخواست میں ترمیم کرکے دوبارہ دائر کرنے کی ہدایت کردی .
چیف جسٹس سندھ ہائیکورٹ جسٹس محمد شفیع صدیقی کی سربراہی میں دو رکنی بینچ کے روبرو بانی ایم کیو ایم کی درخواست پر سماعت ہوئی .

دائر درخواست میں مؤقف اپنایا کہ 2015 کی ایک درخواست میں میری تقاریر پر پابندی عائد کردی گئی . اس درخواست میں مجھے فریق بنایا گیا لیکن وکالت نامے کی تصدیق نہیں ہوئی . لندن میں واقع پاکستانی ہائی کمیشن نے متعدد کوششوں کے باوجود تصدیق نہیں کی .
درخواستگزار کے وکیل نے مؤقف دیا کہ لاکھوں افراد کے رہنما کو اپنے مؤقف بیان کرنے کے حق سے محروم نہیں کیا جاسکتا . وکلا نے ایم کیو ایم انٹرنیشنل سیکرٹریٹ سے جاری کردہ خط عدالت میں جمع کرادیا .
خط کے متن میں کہا گیا کہ میرے خط کو تسلیم کرتے ہوئے میرے وکلاء کی نامزدگی کو قبول کیا جائے . وکلا نے مؤقف دیا کہ بانی ایم کیو ایم سے قومی ترانے سننا اور دیگر کو سنانا چاہتے ہیں .
عدالت نے استفسار کیا کہ درخواست آپ کی جانب سے ہے یا خط لکھنے والے کی جانب سے . وکلا نے مؤقف دیا کہ خط لکھنے والے کی جانب سے درخواست دائر کی گئی ہے .
عدالت نے ریمارکس دیئے کہ درخواست کے متن سے لگتا ہے کہ آپ اپنی خواہش بیان کررہے ہیں . عدالت نے وکلا کو درخواست میں ترمیم کرکے دوبارہ دائر کرنے کی ہدایت کردی .