افریقہ سے اسپین جانے والی کشتی مراکش کے قریب الٹ گئی، مالی کے 25 باشندوں سمیت 69 ہلاک

افریقہ(قدرت روزنامہ)مالی کے حکام نے کہا ہے کہ مغربی افریقہ سے اسپین کے جزائر کینری جانے والی ایک کشتی مراکش کے قریب الٹ گئی، جس کے نتیجے میں 25 مالی باشندوں سمیت کم از کم 69 افراد ہلاک ہو گئے۔الجزیرہ کے مطابق عارضی کشتی الٹنے کا واقعہ چند روز قبل پیش آیا تھا، اس وقت اس میں تقریباً 80 افراد سوار تھے، مالی کی وزارت خارجہ نے ایک بیان میں کہا کہ کشتی میں سوار صرف 11 افراد زندہ بچ سکے ہیں، صورتحال پر نظر رکھنے کے لیے کرائسس یونٹ قائم کیا گیا ہے۔
وزارت کے مشیر ڈولے کیتا نے ایک بیان میں بتایا کہ مالی کے متاثرین میں سے کئی افراد کا تعلق ملک کے مغرب میں واقع کائس کے علاقے سے ہے۔کائس کے علاقے میں واقع مارینا کے کمیون کے میئر مامادو سیبی نے کہا کہ ہلاک ہونے والے 25 مالیوں میں سے 8 کا تعلق میرے کمیون سے ہے۔مرنے والے نوجوانوں نے 7 مہینے پہلے موریطانیہ میں تعمیراتی صنعت میں کام کرنے کے لیے میرا کمیون چھوڑ دیا تھا۔
بدقسمتی سے، وہ یورپ اور امریکا میں اپنے دوستوں کے ساتھ رابطے میں تھے، جنہوں نے انہیں مغربی ممالک کی جانب سفر کرنے کی ترغیب دی، اور زیادہ تر معاملات میں نوجوانوں نے اپنے گھر والوں کو بتائے بغیر خطرناک سفر کیا۔واضح رہے کہ ترقی پذیر ممالک کے باشندوں کی جانب سے یورپی ممالک جاکر ملازمت کرنے کی خواہش کے باعث کئی نوجوان غیرقانونی طریقے سے یورپ جانے کی کوشش کرتے ہیں، اس دوران انہیں خطرناک سمندری سفر سے گزر کر یورپ تک پہنچنا پڑتا ہے۔یورپی ممالک جانے والی غیر قانونی تارکین وطن کی کشتیاں اوور لوڈ ہونے سمیت ناقص سہولتوں کی وجہ سے اکثر حادثات سے دو چار ہوتی رہتی ہیں۔
گزشتہ دنوں یونان جانے والی غیر قانونی تارکین وطن کی کشتی کو حادثے کے نتیجے میں 45 پاکستانی جاں بحق ہوگئے تھے۔