چیمپئنز ٹرافی سے قبل بھارتی کرکٹ ٹیم کیلئے بڑا دھچکا

نئی دہلی(قدرت روزنامہ)انٹرنیشنل کرکٹ کونسل (آئی سی سی) چیمپئنز ٹرافی سے قبل بھارتی کرکٹ ٹیم کو بڑا دھچکا لگنے کا امکان ہے۔بھارت کے فاسٹ بولر جسپریت بمراہ کے چیمپئنز ٹرافی کے گروپ میچز نہ کھیلنے کا امکان ہے۔

بھارتی میڈیا کے مطابق جسپریت بمراہ کی کمر میں سوجھن کی تشخیص ہوئی ہے، وہ بورڈر گواسکر ٹرافی کے سڈنی ٹیسٹ میں کمر کی تکلیف کا شکار ہوئے تھے۔

جسپریت بمراہ سے نیشنل کرکٹ اکیڈمی بنگلورو میں رپورٹ کرنے کیلئے کہا گیا ہے، سلیکشن کمیٹی کو ان کی فٹنس رپورٹ سے آگاہ کر دیا گیا ہے ، بمراہ کو انگلینڈ کے خلاف سیریز کیلئے ٹی ٹوئنٹی اسکواڈ میں بھی شامل نہیں کیا گیا ہے۔بھارتی میڈیا کے مطابق بھارت نے چیمپئنز ٹرافی کے لیے سکواڈ جمع کرانے کیلئے توسیع مانگی ہے۔

واضح رہے کہ چیمپئنز ٹرافی کے لیے ابتدائی سکواڈ آئی سی سی کو جمع کرانے کی آج آخری تاریخ ہے۔سلیکٹرز جسپریت بمراہ کی فٹنس رپورٹس کی روشنی میں ٹورنامنٹ کے قریب جا کر اسکواڈ کا اعلان کرنا چاہتے ہیں۔بھارتی میڈیا کا کہنا ہے کہ جسپریت بمراہ کے مارچ کے پہلے ہفتے تک مکمل فٹ ہونے کا بتایا گیا ہے۔

واضح رہے کہ بھارت نے دبئی میں اپنا آخری گروپ میچ 2 مارچ کو نیوزی لینڈ کے خلاف کھیلنا ہے۔