احمد شہزاد کی پی ایس ایل کے دسویں ایڈیشن کیلئے رجسٹریشن کی تردید

لاہور(قدرت روزنامہ)قومی کرکٹر احمد شہزاد نے پاکستان سپر لیگ ( پی ایس ایل ) کے دسویں ایڈیشن کیلئے رجسٹریشن کی تردید کردی۔

قومی کرکٹر احمد شہزاد نے پی ایس ایل اور پاکستان کرکٹ بورڈ ( پی سی بی ) پر تنقیدی نشتر چلاتے ہوئے پی ایس ایل 10 میں رجسٹریشن کروانے کی تردید کردی ہے۔

یاد رہے کہ اس سے قبل پی ایس ایل مینجمنٹ نے رجسٹرڈ کھلاڑیوں میں احمد شہزاد کا نام بھی شامل کیا تھا۔

تاہم، گزشتہ روز سماجی رابطے کے پلیٹ ایکس پر احمد شہزاد نے اس حوالے سے خصوصی بیان جاری کیا جس میں انہوں نے کہا کہ پی ایس ایل چھوڑنے کا فیصلہ میرٹ کی کمی اور تعلقات کو حقیقی ٹیلنٹ پر ترجیح دینے کی وجہ سے کیا ہے، میں نے پی ایس ایل 10 کے لیے رجسٹریشن نہیں کی تھی اور پچھلے سال لیگ سے عوامی طور پر علیحدگی اختیار کر لی تھی۔

اپنے بیان میں احمد شہزاد نے کہا کہ پی سی بی چاہتا ہے کہ میں ایسی لیگ کا حصہ بنوں جو ہر سال زوال پذیر ہو رہی ہے، پی ایس ایل ایسے کھلاڑیوں کی تلاش میں ہے جو اسے دوبارہ زندہ کر سکیں مگر میں اس لیگ میں میرٹ کی ضمانت کے بغیر دلچسپی نہیں رکھتا۔

قومی کرکٹر نے کہا کہ میں ان لوگوں کے حق میں کھڑا ہوں جنہیں نظرانداز کیا گیا ہے اور اپنے کھیل میں انصاف کے لیے لڑتا رہوں گا۔

ان کا مزید کہنا تھا کہ انشاء اللہ، میں ہمت نہیں ہاروں گا اور آخر تک ثابت قدم رہوں گا۔