آئی سی سی چیمپئنز ٹرافی 2025 کے ٹکٹوں کی فروخت کا دوسرا مرحلہ 3فروری سے شروع ہو گا
لاہور(قدرت روزنامہ) آئی سی سی چیمپئنز ٹرافی 2025 کے ٹکٹوں کی آن لائن فروخت شروع ہوتے ہی کرکٹ شائقین میں زبردست جوش و خروش دیکھنے میں آیا۔ پہلے مرحلے میں 30 فیصد ٹکٹس فروخت کے لیے پیش کیے گئے، جن میں سے پاکستان بمقابلہ نیوزی لینڈ، آسٹریلیا بمقابلہ انگلینڈ اور پاکستان بمقابلہ بنگلہ دیش کے میچز کے تمام ٹکٹس مکمل طور پر فروخت ہو چکے ہیں۔
پی سی بی کے مطابق دوسرے مرحلے میں فزیکل ٹکٹس 3 فروری سے فروخت کے لیے دستیاب ہوں گے جبکہ 100 سے زائد ٹکٹس ٹی سی ایس ایکسپریس سینٹرز سے بھی خریدے جا سکیں گے۔پاکستان کرکٹ بورڈ (PCB) کے مطابق عوام کا ٹکٹوں کی خریداری میں زبردست ردعمل انتہائی خوش آئند ہے۔ چند گھنٹوں میں آن لائن ٹکٹوں کی فروخت اس بات کا ثبوت ہے کہ پاکستانی عوام اپنی ٹیم کے ساتھ کھڑے ہیں، جو ایک مثبت خبر ہے۔ پی سی بی نے مزید کہا کہ وہ زیادہ سے زیادہ تماشائیوں کو اس تاریخی ایونٹ کے میچز دیکھنے کی سہولت فراہم کرے گا۔