کیا فوڈ ڈیلیوری میں استعمال ہونے والے کالے پلاسٹک کے ڈبے کینسر کا باعث بن رہے ہیں؟

اسلام آباد (قدرت روزنامہ)حالیہ تحقیق اور ماہرین کی رائے کے مطابق، کھانے کی ترسیل کے لیے استعمال ہونے والے سیاہ پلاسٹک کے کنٹینرز ممکنہ طور پر صحت کے لیے نقصان دہ ہو سکتے ہیں، خاص طور پر اگر ان میں گرم، تیل یا تیزابیت والا کھانا رکھا جائے۔ سیاہ پلاسٹک عام طور پر ری سائیکل شدہ مواد، بشمول پرانے الیکٹرانکس، سے تیار ہوتا ہے اور اس میں کیمیکل جیسے decaBDE شامل ہوتے ہیں جو کھانے میں شامل ہو سکتے ہیں۔
صحتمند زندگی قدرت کا شاندار عطیہ ہے، ایک صحت مند انسان ہی چاق وچوبند اور بھرپور زندگی گزار سکتا ہے, لہٰذا اپنی اور اپنے خاندان کی صحت کے لئے احتیاط اور حفظانِ صحت کے اصولوں پر کاربند ہونا بہت ضروری ہے.
وقت کے ساتھ ہمارے طرزِزندگی میں بہت سی تبدیلیاں آجاتی ہیں، اس مشینی اور جدید دور کا انسان نہایت آسانیوں کا عادی ہوتا جارہا ہے اور ہماری روزمرہ کی زندگی میں بہت سی تبدیلیاں آچکی ہیں جیسے پہلے مٹی اور تانبے کے برتنوں کی جگہ سلور اور مائیکروویو نے لی اور اب پلاسٹک کے برتنوں کا استعمال ہماری زندگی میں دن بہ دن بڑھتا جارہا ہے ، اسکی ایک وجہہ یہ بھی ہے کہ پلاسٹک کے برتن ڈسپوزبل ہوتے ہیں اور ہم ٹہرے آسانیوں کے عادی۔ لیکن یہ پلاسٹک ہماری زندگی میں کس طرح نقصان دہ ہے اور ہماری صحت پر اثرانداز ہورہی ہے یہ جاننا بھی ہمارے لیے بہت ضروری ہے۔
آئیے جانتے ہیں کہ سیاہ پلاسٹک ہماری صحت کے لئے کس طرح نقصان دہ ہے۔
صحت کے لیے کینسر کے خطرات
سیاہ پلاسٹک میں شامل بعض اجزاء، خاص طور پر کاربن بلیک، ممکنہ کارسنجن (کینسر پیدا کرنے والے اجزاء) سمجھے جاتے ہیں۔
یہ کیمیکل اینڈوکرائن ڈسپرٹرز کے طور پر کام کرتے ہیں، جو ہارمونی توازن کو بگاڑ سکتے ہیں اور پی سی او ڈی، تھائرائیڈ مسائل اور دیگر بیماریوں کا سبب بن سکتے ہیں۔
اسکے علاوہ پلاسٹک میں موجود کیمیکل ذیابیطس، پروسٹیٹ مسائل، IQ میں کمی، اور اعصابی نشوونما کے مسائل کا باعث بھی بن سکتے ہیں۔
ماہرین کی رائے اور احتیاطی تدابیر
ڈاکٹر کنچن کور (میڈانتا کینسر کیئر) کے مطابق، سیاہ پلاسٹک کے برتنوں میں کھانے کو ذخیرہ کرنا یا مائیکروویو میں گرم کرنا نقصان دہ ہو سکتا ہے، کیونکہ درجہ حرارت میں تبدیلی نقصان دہ کیمیکلز کو کھانے میں شامل کر سکتی ہے۔ اس لیے ان کنٹینرز کے استعمال سے گریز کرنے کی ہدایت کی جاتی ہے۔
محفوظ متبادل کیا ہے؟
شیشے اور اسٹیل کے برتن
مٹی کے برتن (لیڈ فری)
قدرتی مواد جیسے کیلے کے پتے اور بانس کے برتن
کینسر کے خطرے کو کم کرنے کے اقدامات
پلاسٹک میں کھانے کو ذخیرہ اور گرم کرنے سے گریز کریں۔
ریستورانوں اور فوڈ چینز کو زیادہ ماحول دوست پیکیجنگ اپنانے کی ترغیب دیں۔
تازہ، مقامی اور غیر پروسیس شدہ کھانے کو ترجیح دیں۔
یاد رکھیں صحت دنیا کی سب سے بڑی دولت ہے اس کی حفاظت ہماری ذمہ داری ہے لہٰذا احتیاطی تدابیر اختیار کرنا ہی بہتر حکمت عملی ہے۔