’سفیان مقیم چیمپئنز ٹرافی کے لیے اسکواڈ میں ضرور آئیں گے‘

لاہور(قدرت روزنامہ)اسپورٹس جرنلسٹ شاہد ہاشمی کا کہنا ہے کہ چیمپئنز ٹرافی کے لیے اسکواڈ میں سفیان مقیم ضرور آئیں گے۔

اے آر وائی نیوز کے پروگرام میں گفتگو کرتے ہوئے اسپورٹس جرنلسٹ شاہد ہاشمی نے کہا کہ آپ یہ کہہ رہے ہیں کہ اسکواڈ میں سارے فاسٹ بولر فریش ہیں لیکن پندرہ کے اسکواڈ میں ایک اسپنر اور چاہیے۔

انہوں نے کہا کہ میری خواہش اور خبر یہ ہے کہ سفیان مقیم آئیں گے اور ضرور آئیں گے اور انہیں آنا بھی چاہیے کیونکہ ایک اسپنر اور ہونا چاہیے۔

واضح رہے کہ سابق کرکٹرز کی جانب سے سہ ملکی سیریز اور چیمپئنز ٹرافی میں پاکستان کی واحد اسپنر کی حکمت عملی پر تشویش کا اظہار کیا تھا کیونکہ ٹیم میں صرف ایک اسپنر ابرار احمد کو رکھا گیا ہے۔

وائٹ بال کے کپتان محمد رضوان نے کہا تھا کہ یہ فیصلہ ہوم گراؤنڈ کو دیکھتے ہوئے کیا گیا ہے۔

ان کا کہنا تھا کہ ہوم گراؤنڈ پر اوس کا عنصر ہوتا ہے جس کی وجہ سے ہم نے سوچا کہ دو اسپنرز کام نہیں آسکیں گے۔

رضوان کا کہنا تھا کہ اگر ٹیم کو کسی اور اسپنر کی ضروت پڑی تو سلمان آغا کو بولنگ کرواسکتے ہیں یا خوشدل شاہ کو پلیئنگ الیون میں رکھا جاسکتا ہے۔

یاد رہے کہ سفیان مقیم نے ڈیبیو میچ میں شاندار بولنگ کرتے ہوئے 52 رنز کے عوض چار وکٹیں حاصل کی تھیں۔