وزیر اعلیٰ بلوچستان میر سرفراز بگٹی کی زیر صدارت چیف منسٹر یوتھ اسکلز ڈویلپمنٹ پروگرام کی پیش رفت سے متعلق جائزہ اجلاس

کوئٹہ (قدرت روزنامہ)وزیر اعلیٰ بلوچستان میر سرفراز بگٹی کی زیر صدارت چیف منسٹر یوتھ اسکلز ڈویلپمنٹ پروگرام کے حوالے سے پیش رفت کا جائزہ اجلاس منعقد ہوا۔ اجلاس میں نوجوانوں کو بیرون ملک روزگار کے لیے بھیجنے کے پروگرام کو حتمی شکل دی گئی۔ آئندہ ہفتے نوجوانوں کا پہلا بیچ سعودی عرب روانہ ہوگا، جس کی تربیت مکمل کر لی گئی ہے، اور مزید نامزدگی کا عمل جاری ہے۔
وزیر اعلیٰ بلوچستان میر سرفراز بگٹی نے اجلاس سے خطاب کرتے ہوئے کہا کہ یہ پروگرام سرکاری سطح پر پاکستان کی تاریخ کا پہلا پروگرام ہے جو بلوچستان سے شروع ہو رہا ہے۔ پانچ سال میں 30 ہزار نوجوانوں کو ہنر مند بنا کر بیرون ملک روزگار کے لیے بھیجنے کا ہدف مقرر کیا گیا ہے۔ انہوں نے کہا کہ پروگرام پر عمل درآمد میں حائل تمام رکاوٹوں کو دور کرکے اس کی رفتار کو تیز کیا جائے گا۔
وزیر اعلیٰ نے کہا کہ ویزہ اور پاسپورٹ کے پروسس کو سہل اور تیز کرنے کے لیے وزارت خارجہ اور وزارت داخلہ سے رابطہ کیا جائے گا۔ اس کے علاوہ، نوجوانوں کے طبی ٹیسٹ کا عمل سرکاری لیبارٹریوں میں کیا جائے گا تاکہ بلوچستان کے منتخب امیدواروں کو اسلام آباد میں طویل انتظار سے بچایا جا سکے۔ انہوں نے کہا کہ یوتھ اسکلز ڈویلپمنٹ پروگرام میں امیدواروں کی اہلیت کا ٹیسٹ اور انتخاب کا عمل تیز کیا جائے گا تاکہ زیادہ سے زیادہ نوجوانوں کو ہنر مند بنا کر بیرون ملک روزگار کے قابل بنایا جا سکے۔
وزیر اعلیٰ نے یقین دہانی کرائی کہ پروگرام کے لیے تمام درکار وسائل فراہم کیے جائیں گے اور آپریشنل بجٹ کی بروقت فراہمی کو یقینی بنایا جائے گا۔ انہوں نے کہا کہ پروگرام میں حائل رکاوٹوں کو دور کر کے اسے ایک مثالی پروگرام بنایا جائے گا، جو نوجوانوں کی معاشی ترقی اور زر مبادلہ کے حصول میں اہم کردار ادا کرے گا۔
اجلاس میں مشیر محنت و افرادی قوت سردار غلام رسول عمرانی، چیف سیکرٹری بلوچستان شکیل قادر خان، سیکرٹری خزانہ عمران زرکون، پرنسپل سیکرٹری بابر خان، سیکرٹری لیبر نیاز احمد نیچاری، ڈی جی بی ٹیوٹا طارق جاوید مینگل اور دیگر متعلقہ حکام نے شرکت کی۔