بھارتی اداکارہ کو جم میں وزن اٹھانا مہنگا پڑ گیا، دو ماہ بستر سے ہل بھی نہ سکیں

ممبئی(قدرت روزنامہ)مشہور اداکارہ راکول پریت سنگھ نے اپنی ریڑھ کی ہڈی میں شدید چوٹ کے بارے میں انکشاف کیا ہے، جو 80 کلو ڈیڈ لفٹ کے دوران پیش آیا۔

یہ چوٹ اتنی شدید تھی کہ وہ دو ماہ تک بستر پر رہیں اور مشکل سے ایک منٹ کھڑی ہو پاتی تھیں۔

ایک انٹرویو میں راکول نے بتایا کہ چوٹ نے نہ صرف ان کے جسم پر بلکہ ذہنی طور پر بھی بڑا اثر ڈالا۔

انہوں نے کہا، “یہ میرے لیے ایک سبق تھا، اور اب میں اپنی ریڑھ کی ہڈی کو اسٹیل جیسا مضبوط بناؤں گی۔”

راکول نے فٹنس میں واپس آنے کے لیے سخت ریہیبیلیٹیشن (بحالی) کی، جس میں آبی تھراپی (Aqua Therapy) شامل تھی۔

انہوں نے بتایا کہ “میں نے پانی میں تمام ڈانس سٹیپس کو پریکٹس کیا تاکہ چوٹ دوبارہ نہ ہو۔”

راکول نے انکشاف کیا کہ وہ ابھی بھی 100 فیصد فٹ نہیں ہوئیں اور تقریباً 10 فیصد ریکوری باقی ہے، لیکن وہ پرامید ہیں کہ جلد مکمل فٹنس حاصل کر لیں گی۔

راکول پریت سنگھ کے مداح ان کی مضبوطی اور حوصلے سے متاثر ہو رہے ہیں، اور ان کی جلد مکمل صحت یابی کے لیے دعا گو ہیں!