میری خواہش ہے شیر افضل مروت پارٹی میں رہیں، عمران خان سے بات کروں گا، جنید اکبر

پشاور(قدرت روزنامہ)پاکستان تحریک انصاف خیبرپختونخوا کےصدرجنید اکبرخان نے کہا ہے کہ ان کی یہی خواہش ہے کہ شیرافضل مروت پارٹی کا حصہ رہیں اور اس حوالے سے وہ بانی چیئرمین عمران خان سے مل کر بات بھی کریں گے۔
میڈیا سے گفتگو کرتے ہوئے جنید اکبر خان نے کہا کہ ویسے انہیں شیرافضل مروت سے متعلق ہدایات کا علم نہیں ہے اور نہ ہی اس بات کا تعلق صوابی جلسےسے ہے لیکن بہرحال میں عمران خان سے جب ملوں گا تو اپنا مؤقف ان کے سامنے رکھ دوں گا۔
جنیدا کبر خان کا کہنا تھا کہ میری توخواہش ہوگی کہ شیرافضل مروت پارٹی میں رہیں کیوں کہ انہوں نے برے وقت میں مجھے سپورٹ کیا جس پر میں ان کا احسان مند ہوں۔
انہوں نے کہا کہ برے وقت میں میرے لیے سب سےتوانا آواز شیر افضل مروت ہی تھے۔
واضح رہے کہ میڈیا رپورٹس کے مطابق عمران خان نے سینیئر رہنما اور رکن قومی اسمبلی شیر افضل مروت کو پارٹی سے نکالنے کا فیصلہ کیا ہے اور ان پر متعدد بار پارٹی ڈسپلن کی خلاف ورزی کرنے اور پارٹی مخالف بیانات دینے کا الزام ہے۔
حال ہی میں صوابی میں ہونے والے جلسے کے دوران شیر افضل مروت کو اسٹیج پر جگہ نہیں ملی تھی اور نہ ہی انہیں تقریر کا موقع دیا گیا جس پر انہوں نے شکوہ کیا تھا۔
اس واقعے کے بعد پارٹی رہنماؤں نے بانی پی ٹی آئی سے ان کی شکایت کی تھی جس کے نتیجے میں یہ فیصلہ کیا گیا۔ جلد ہی شیر افضل مروت کی بنیادی رکنیت ختم کرنے کا باضابطہ نوٹیفکیشن جاری کیا جائے گا اور ان سے قومی اسمبلی کی رکنیت سے استعفیٰ بھی طلب کیا جائے گا۔
کہا جا رہا ہے کہ بدھ کو پارٹی چیئرمین بیرسٹر گوہر اور رہنما بیرسٹر علی ظفر کی اڈیالہ جیل میں عمران خان سے ملاقات کے دوران شیر افضل مروت کو برطرف کرنے کی ہدایت دی گئی تاہم دونوں کا کہنا ہے کہ بانی چیئرمین نے ان سے ایسا کچھ نہیں کہا۔