کیا “دی کپل شرما شو” سکرپٹڈ ہوتا ہے؟ سُمونا چکرورتی کا حیران کن انکشاف

ممبئی (قدرت روزنامہ) بھارت کے مشہور کامیڈی شو “دی کپل شرما شو” کے بارے میں ایک عرصے سے یہ سوال اٹھایا جا رہا تھا کہ آیا یہ مکمل طور پر سکرپٹڈ ہوتا ہے یا اس میں اداکاروں کو اپنی مرضی سے مکالمے بولنے کی آزادی دی جاتی ہے۔ اب شو کا حصہ رہنے والی اداکارہ سُمونا چکرورتی نے اس حوالے سے اہم انکشافات کیے ہیں۔

حالیہ انٹرویو میں سُمونا چکرورتی نے بتایا کہ اس شو میں سکرپٹ پر سختی سے عمل کرنا پڑتا تھا اور مکالموں میں تبدیلی یا فی البدیہہ جملے شامل کرنے کی اجازت نہیں ہوتی تھی۔ انہوں نے کہا “میرے اپنے مزاح کا ایک الگ انداز ہے لیکن وہ اس شو میں کام نہیں کرتا اس لیے میرے لیے یہ خالص اداکاری تھی۔”

سُمونا نے مزید کہا “جب ہمیں سکرپٹ ملتا تھا تو میں قلم اور کاغذ لے کر بیٹھتی، تمام جملوں کو ہائی لائٹ کرتی، انہیں لفظ بہ لفظ یاد کرتی، کیونکہ پنچ لائنز بہت اہم ہوتی تھیں۔ اس کے ساتھ ساتھ میں کپل شرما کے مکالمے بھی یاد رکھتی تھی تاکہ مزاح کی صحیح ٹائمنگ برقرار رہے۔” انہوں نے تصدیق کی کہ شو کے فارمیٹ میں کسی قسم کی فی البدیہہ مزاحیہ گفتگو (Improv) کی اجازت نہیں تھی، اور تمام فنکاروں کو مخصوص مکالمے اور ایپی سوڈ کے بہاؤ کے مطابق چلنا ہوتا تھا۔