سموگ میں کمی،زیادہ پیدوار،کاشتکارخوشحال۔۔۔زراعت میں مزید انقلابی اقدامات کریں گے: مریم نواز
لاہور ( قدرت روزنامہ )پنجاب میں سپر سیڈر ز کے استعمال سے شاندار نتائج سامنے آئے ہیں -سپر سیڈر ز کے استعمال سے سموگ میں کمی نوٹ کی گئی ہے جبکہ گندم کی زیادہ بوائی سے زیادہ پیداوار متوقع ہے اور ان تمام عوامل سے کاشتکار خوشحال ہورہاہے-
تفصیلات کے مطابق ایک سٹڈی میں بتایا گیاکہ سپر سیڈرز کے استعمال سے ایک ہزار کاشتکاروں نے چند ماہ میں 57کروڑ 95لاکھ روپے کمالیے-صوبے بھر میں گندم کی کاشت میں سپر سیڈرز کے ذریعے330ٹن بیج کی بچت ہوئی ہے-روایتی طریقہ کار کے مقابلے میں 18لاکھ 70ہزار لیٹر ڈیزل کا کم استعمال ہواہے-سپر سیڈرز سے کاشت پر ڈیزل کے استعمال میں 48کروڑ 62لاکھ روپے کی بچت ہوئی ہے-کاشتکارکو سپر سیڈرز سے گندم کی بوائی پر فی ایکڑ3666روپے کی بچت ہوئی ہے-31اضلاع میں 7805کاشتکاروں نے سپر سیڈرز کے ذریعے110014 ایکڑ اراضی پر گندم کی کاشت کی گئی-7805 کسانوں نے 68,185 ایکڑ پر رینٹل سروس کے ذریعے سپر سیڈرز استعمال کیے-93فیصد کاشتکاروں نے سپر سیڈرز سے کاشت پر گندم کے اگاؤکو بہترین قرار دیاہے-
وزیر اعلیٰ پنجاب مریم نواز نے سپر سیڈرز سے بوائی کے نتائج پر اطمینان کااظہار کیا -کاشتکاروں نے اپنے تاثرات کااظہار کرتے ہوئے بتایاکہ سپر سیڈرز کے ذریعے گندم کی بوائی کے بہترین نتائج سامنے آئے ہیں – سپر سیڈرز کے ذریعے گندم کی بوائی روایتی طریقہ کار کی نسبت بہترین ہے- کاشتکاروں نے مزید بتایا کہ زمین کی زرخیزی بڑھانے کے لئے سپر سیڈرز کا استعمال عمدہ نتائج کا حامل ہے۔آئندہ بھی سپر سیڈرز استعمال کرکے ہی گندم کاشت کریں گے۔ سپر سڈرز سے ایک ایکڑ میں گندم کی بوائی صرف ایک گھنٹے میں مکمل ہونے سے وقت اور وسائل بچتے ہیں۔
وزیراعلیٰ مریم نواز نے کہاکہ ایگریکلچر میکانائزیشن صرف آغاز ہے،سپر سیڈرز سے بوائی پر 100 روپے فی ایکڑمزدوری کی مد میں بچت ہوئی ہے،بیج کے استعمال میں 50 کلو سے 47 کلو فی ایکڑ کمی ہوئی ہے – زراعت میں مزید انقلابی اقدامات کریں گے-سپر سیڈرز سے زراعت میں جدت کا خواب حقیقت بن رہا ہے-لیبر کاسٹ، وقت اور ایندھن کی بچت سے کسانوں کو بڑا ریلیف ملاہے- ہمارا مشن کسانوں کی خوشحالی، زراعت میں جدت اور ترقی ہے-وزیراعلی مریم نواز شریف نے کہاکہ پنجاب کو جدید زرعی ٹیکنالوجی کا مرکز بنا ہمارا عزم ہے-پیداواری لاگت میں کمی اور زیادہ منافع ہماری حکمت عملی کا حصہ ہے-