ڈیرہ اسماعیل خان میں سیکیورٹی فورسز کے دو آپریشنز، 7 خوارج ہلاک
راولپنڈی(قدرت روزنامہ)سیکیورٹی فورسز نے ڈیرہ اسماعیل خان میں دو الگ الگ انٹیلی جنس بیسڈ آپریشنز میں 7 خوارج کو ہلاک کر دیا۔پاک فوج کے شعبہ تعلقات عامہ ( آئی ایس پی آر ) کی جانب سے جاری کردہ بیان کے مطابق پہلا آپریشن درابن کے علاقے میں خوارج کی موجودگی کی خفیہ اطلاعات پر کیا گیا جس کے دوران سیکیورٹی فورسز نے 4 خوارج کو جہنم واصل کر دیا۔
دوسرا آپریشن مادی کے علاقے میں کیا گیا جہاں سیکیورٹی فورسز نے 3 مزید خوارج کو ہلاک کیا جبکہ آپریشنز کے دوران خوارج سے اسلحہ اور گولہ بارود بھی برآمد کیا گیا۔آئی ایس پی آر نے بتایا کہ مارے گئے خوارج دہشت گردی کی متعدد کارروائیوں میں ملوث تھے جن میں سیکیورٹی فورسز اور معصوم شہریوں کے خلاف حملے شامل ہیں۔علاقے میں خوارج کی ممکنہ موجودگی کے پیش نظر سینیٹائزیشن آپریشن جاری ہے۔آئی ایس پی آر نے مزید کہا کہ سیکیورٹی فورسز ملک سے دہشت گردی کی لعنت کو ختم کرنے کے لیے پوری طرح پرعزم ہیں اور اس سلسلے میں مسلسل کوششیں جاری رکھیں گی۔