دوستی کی کالز سے محتاط رہیں ،آپ ہنی ٹریپ کا شکار ہوسکتے ہیں ،معصوم شہریوں کیلئے آگاہی مہم شروع

لاہور ( قدرت روزنامہ )وزیراعلی پنجاب کی ہدایت پر محکمہ داخلہ پنجاب نے معصوم شہریوں کو دھوکہ باز عناصر سے خبردار کرنے کیلئے آگاہی مہم شروع کردی ہے۔

تفصیلات کے مطابق محکمہ داخلہ پنجاب نے اس ضمن میں سوشل میڈیا کے ذریعے ہونے والے فراڈ سے بچاؤ کیلئے اہم ہدایات جاری کیں۔ محکمہ داخلہ پنجاب نے ہدایت کی ہے کہ واٹس ایپ سمیت دیگر سوشل میڈیا پلیٹ فارمز پر انجان لوگوں سے معلومات ہرگز شیئر نہ کریں۔ شہری انجانے نمبرز سے آنے والی کالز اور میسجز پر کوئی رقم یا کوڈ ہرگز نہ بھجوائیں۔ اسی طرح نان کسٹم پیڈ اشیاء کی خریداری کیلئے کوڈ اور اکاؤنٹ نمبر کسی سے شئیر نہ کریں اور نہ ہی کسی عزیز کے اغواء کی جھوٹی کال پر کوئی رقم بھیجیں۔

ترجمان محکمہ داخلہ پنجاب نے خبردار کیا ہے کہ شہری خواتین کی جانب سے دوستی کی کالز سے محتاط رہیں اس طرح آپ ہنی ٹریپ کا شکار ہوسکتے ہیں۔ محکمہ داخلہ پنجاب نے ہدایت کی ہے کہ شہری کسی انجان شخص کو اپنی دفتری، ذاتی یا خاندانی معلومات ہرگز نہ دیں اور انٹرنیٹ پر کوئی بھی مشکوک یا انجان لنک کھولنے سے گریز کریں۔ شہری کسی بھی مشکوک سرگرمی یا فراڈ کی اطلاع فوری طور پر ایمرجنسی 15 پر دیں۔

ترجمان محکمہ داخلہ پنجاب کے مطابق محکمہ داخلہ نے ہدایت کی ہے کہ شہری سوشل میڈیا اور تمام ڈیجیٹل پلیٹ فارمز مکمل زمہ داری سے استعمال کریں تاکہ مختلف نوعیت کے فراڈ سے بچا جا سکے۔