خبردار! 15 سال پرانی گاڑیوں کو اب پیٹرول نہیں ملےگا


اسلام آباد (قدرت روزنامہ)ماحولیاتی آلودگی پر قابو پانے کے لیے جہاں دنیا بھر میں تیزی سے اقدامات کیے جارہے ہیں وہیں بھارت نے بھی 15 سال پرانی گاڑیاں ختم کرنے کا فیصلہ کیا ہے۔
بھارتی حکومت نے فیصلہ کیا ہے کہ ہندوستان کے دارالحکومت نئی دہلی میں 15 سال سے زیادہ پرانی گاڑی کو یکم اپریل سے پیٹرول نہیں دیا جائےگا۔
بھارتی میڈیا کے مطابق ہندوستان کے وزیر ماحولیات منجندر سنگھ سرسا نے کہا ہے کہ حکومت کی جانب سے تمام پیٹرول پمپس پر ایسے آلات نصب کیے جائیں گے جس سے 15 سال سے پرانی گاڑیوں کی شناخت ہوسکے گی۔
یاد رہے کہ نئی دہلی اور نیشنل کیپیٹل ریجن (این سی آر) میں پہلے ہی پالیسی نافذ ہے کہ 10 سال سے پرانی ڈیزل گاڑیاں اور 15 سال سے پرانی پیٹرول گاڑیاں سڑکوں پر چلانے کی اجازت نہیں۔
2021 میں ایک ہدایت نامہ جاری کرتے ہوئے کہا گیا تھا کہ یکم جنوری 2022 کے بعد خلاف ورزی کے مرتکب افراد کی گاڑیاں ضبط کرکے کباڑ خانے میں بھیج دی جائیں گی۔
بھارتی دارالحکومت دہلی اور پاکستان کے شہر لاہور میں فضائی آلودگی کا اندازہ اس حساب سے لگایا جا سکتا ہے کہ ہر سال نومبر دسمبر میں ان شہروں کا ایئر کوالٹی انڈیکس پہلے دوسرے نمبر پر ہی رہتا ہے، اور سانس لینا محال ہو جاتا ہے۔ اس میں جہاں فصلوں کو جلانے کا عنصر بھی شامل ہے وہیں دھواں چھوڑتی گاڑیاں بھی اس میں اپنا حصہ ڈال رہی ہوتی ہیں۔