چیف منسٹر پنجاب فری سولر پینل اسکیم کا آغاز، فری سولر پینل اسکیم کی خود کار ڈیجیٹل قرعہ اندازی

لاہور (قدرت روزنامہ)بھاری بجلی بلوں سے پریشان عوام کو مہنگی بجلی سے نجات دلانے کے لیے وزیر اعلیٰ پنجاب مریم نواز نے چیف منسٹر پنجاب فری سولر پینل اسکیم کا آغاز کردیا۔
رپورٹ کے مطابق وزیراعلیٰ مریم نوازشریف کے مختلف نمبر بتانے پر فری سولر پینل سکیم کی خودکار ڈیجیٹل قرعہ اندازی کی گئی، مریم نواز نے فری سولر پینل سکیم میں کامیابی حاصل کرنے والے خوش نصیب صارفین کو مبارکباد دی۔
وزیراعلی نے سولر پینل انسٹالیش پراسیس جلد از جلد مکمل کرنے کی ہدایت کی اور کہا کہ عوام کومہنگی بجلی سے ریلیف دینا چاہتے ہیں، ہرگز تاخیر نہ کی جائے، فری سولر پینل سکیم کو جلد از جلد پایہ تکمیل تک پہنچا یا جائے۔
فزیکل ویری فکیشن کے بعد مارچ کے آخر میں صوبہ بھر میں سولر سسٹم کی انسٹالیشن شروع ہو گی، جولائی کے آخرتک فری سولر پینل سکیم کا پہلا فیز مکمّل ہو جائے گا۔
سیکریٹری انرجی نے چیف منسٹر پنجاب کو فری سولر پینل اسکیم کے بارے میں بریفنگ دی اور بتایا کہ سی ایم پنجاب فری سولر پینل سکیم کے تحت سال بھر میں 94483 سولر سسٹم لگائے جائیں گے۔ صوبہ میں ماہانہ 200 یونٹ تک صرف کرنے والے صارفین کے لئے سولر سسٹم مفت انسٹال کیا جائے گا۔
بریفنگ میں کہا گیا کہ فری سولر پینل سکیم کے لئے 861000 صارفین نے اپلائی کیا، فری سولر پینل سکیم کا تمام پراسیس اینڈ ٹو اینڈ ڈیجیٹلائزیشن کے ذریعے مکمل کیا گیا۔ 0.55کلوواٹ کے 47182 اور 1.1 کلوواٹ کے 47301 سسٹم انسٹال کئے جائیں گے۔
اس میں کہا گیا کہ 100یونٹ ماہانہ اور 200یونٹ تک ماہانہ بجلی صرف کرنے والے صارفین کو سولر سسٹم مفت دیاجائے گا، صارفین کے ماہانہ بل پر درج ریفرنس نمبر اور سی این آئی سی نمبر سے ویری فکیشن کی جائے گی۔
بریفنگ کے مطابق فری سولر پینل حاصل کرنے والے صارفین کی معاونت او ررہنمائی کے لئے ہیلپ لائن بھی قائم کی گئی ہے، سولر پینل اور انورٹر کو چوری سے بچانے کے لئے صارف کے کمپیوٹرائزڈ شناختی کارڈ سے منسلک کیا جائے گا، پنجاب میں ایک لاکھ سولر سسٹم انسٹال کرنے سے 57ہزار ٹن کاربن کااخراج کم ہوگا، فری سولرپینل سکیم سے وفاقی حکومت پر بھی سبسڈی کا بوجھ کم ہوگا۔