ملک کے مختلف علاقوں میں گرج چمک کے ساتھ مزید بارش کی پیشگوئی

اسلام آباد(قدرت روزنامہ)محکمہ موسمیات نے ملک کے مختلف علاقوں میں گرج چمک کے ساتھ مزید بارش کی پیشگوئی کر دی۔

نجی ٹی وی چینل ہم نیوز کے مطابق ملک کے بیشتر علاقوں میں موسم سرد اور خشک رہنے کی توقع ہے، محکمہ موسمیات کے مطابقگلگت بلتستان، کشمیر، مری، گلیات، خطہ پوٹھوہار اور اسلام آباد میں چند مقامات پر بارش اور پہاڑوں پر برفباری کا امکان ہے۔

اسلام آباد میں وقفے وقفے سے مزید بارش کا امکان ہے جبکہ چند مقامات پر موسلادھار بارش ہونے کی توقع ہے، مری، گلیات اورگرد و نواح میں مزید بارش و برفباری کا امکان ہے۔راولپنڈی، چکوال، جہلم، گجرات، گوجرانوالہ، سیالکوٹ، نارووال، لاہور، شیخو پورہ، اوکاڑہ، فیصل آباد، جھنگ اور ٹو بہ ٹیک سنگھ میں بارش ہونے کی توقع ہے۔

بالائی خیبرپختونخوامیں گرج چمک کے ساتھ مزید بارش کی پیشگوئی کی گئی ہے، دیر، سوات، شانگلہ، کوہستان، مانسہرہ، بٹگرام، بونیرباجوڑ، مالاکنڈ، ہری پور، صوابی اور مردان میں مزید بارش کا امکان ہے جبکہ ایبٹ آباد، چارسدہ اور نوشہرہ میں گرج چمک کے ساتھ بارش کی توقع ہے۔

بلوچستان کے بیشتر اضلاع میں موسم خشک اور سرد رہنے کا امکان ہے جبکہ سندھ کے بیشتر اضلاع میں موسم خشک رہنے کی توقع ہے، گلگت بلتستان اور آزاد کشمیر کے مختلف حصوں میں مزید بارش اور برفباری کا امکان ہے۔

دوسری جانب وادی لیپہ میں برفباری کاسلسلہ جاری ہے جس سے سردی کی شدت میں اضافہ ہو گیا ہے، برفانی تودے گرنے سے وادی لیپہ کا دیگر علاقوں سے زمینی رابطہ منقطع ہو گیا ہے، برفباری کے باعث مواصلاتی نظام متاثر ہے، متعدد علاقے بجلی سے محروم ہیں، برفباری کی وجہ سے سرکاری اور پرائیویٹ تعلیمی اداروں میں چھٹی دی گئی ہے۔