برفباری اور شدید بارش، حکومت نے 7 مارچ تک اسکول بند کردیئے

اسلام آباد (قدرت روزنامہ)گلیات اور آزاد جموں و کشمیر کے متعدد اضلاع میں شدید برفباری اور بارش کے باعث تعلیمی ادارے بند کر دیے گئے ہیں۔
ایبٹ آباد میں گلیات کے تمام سرکاری اور نجی تعلیمی ادارے چار روز کے لیے بند رہیں گے۔ برفباری کے پیش نظر یونین کونسلز برنالی، نگری بالا، نتھیا گلی، تجوال پٹن کلاں، کوکوم، نملی میرا اور خیرا گلی کے اسکول بھی بند کر دیے گئے ہیں۔
ضلعی تعلیمی افسر افتخار الغنی نے اسکولوں کی بندش کا نوٹیفکیشن جاری کرتے ہوئے ماتحت افسران کو اس پر عملدرآمد یقینی بنانے کی ہدایت دی ہے۔ انہوں نے ڈپٹی کمشنر کو بھی مراسلہ ارسال کیا تھا جس میں متاثرہ علاقوں کے اسکولوں میں تین روزہ تعطیل کی سفارش کی گئی تھی۔
اسی طرح آزاد کشمیر میں بھی شدید موسمی حالات کے باعث پانچ اضلاع میں تعلیمی ادارے بند رکھنے کا اعلان کیا گیا ہے۔
پونچھ کمشنر سردار وحید کے مطابق پونچھ ڈویژن کے چار اضلاع میں تمام تعلیمی ادارے بند رہیں گے جبکہ مظفرآباد ڈویژن کے کمشنر مسعود الرحمٰن نے نیلم ضلع میں اسکولوں کی تعطیل کا اعلان کیا ہے۔
حکام نے سیاحوں کو نیلم ویلی اور لیپہ ویلی کے سفر سے گریز کرنے کی ہدایت کی ہے کیونکہ برفباری کے باعث سڑکوں پر سفر کرنا خطرناک ہو سکتا ہے۔
ریسکیو ٹیمیں اور مقامی انتظامیہ ہائی الرٹ پر ہیں اور سڑکوں کی بحالی کے لیے کام جاری ہے۔ عوام سے اپیل کی گئی ہے کہ سفر سے قبل موسم کی تازہ ترین صورتحال جانچ لیں۔
مری اور گلیات میں شدید برفباری کے باعث سڑکیں بند ہو چکی ہیں جس کے پیش نظر ضلعی انتظامیہ نے سیاحوں کے داخلے پر پابندی عائد کر دی ہے تاکہ کسی بھی قسم کی سفری مشکلات سے بچا جا سکے۔
مری ایکسپریس وے کو 17 مائل ٹول پلازہ سے بند کر دیا گیا ہے جبکہ ہائی وے ڈیپارٹمنٹ برف ہٹانے اور سڑکوں کو بحال کرنے میں مصروف ہے۔ برفانی سڑکوں پر گاڑیوں کے پھسلنے سے بچنے کے لیے نمک بھی چھڑکا جا رہا ہے۔
شدید موسم کے باعث بجلی کی فراہمی بھی متاثر ہوئی ہے جبکہ گھنے کہر اور تیز ہواؤں نے سردی کی شدت میں مزید اضافہ کر دیا ہے۔
گلیات ڈی ایس پی امتیاز کے مطابق برفباری کے باعث سڑکیں ناقابلِ سفر ہو چکی ہیں جس کے پیش نظر عوام کو غیر ضروری سفر سے گریز کرنے کی ہدایت کی گئی ہے۔ انتظامیہ نے برفانی طوفان کے خطرے کے پیش نظر باریان اور ہارنو کے راستے گلیات میں داخلے پر بھی پابندی لگا دی ہے۔