دیہی مراکز صحت کی آؤٹ سورسنگ کا اصولی فیصلہ، ری ویمپنگ مکمل، سرجری، ٹیسٹ اور دیگر سہولیات میسر ہونگی ,نئے کلینک 24گھنٹے کھلے رہیں گے
لاہور ( قدرت روزنامہ )وزیراعلیٰ پنجاب مریم نواز کی زیر صدارت ہیلتھ سے متعلق خصوصی اجلاس ہوا جس میں پنجاب بھر میں دیہی مراکز صحت کی آؤٹ سورسنگ کا اصولی فیصلہ کیا گیا۔ اجلاس میں ڈویژنل لیول پر ہر مرض کے علاج کے لئے میڈیکل سٹی بنانے کی تجویز کا جائزہ لیا گیا۔ ہر ضلع کی سطح پر برن یونٹ،کارڈیک سنٹراور چلڈرن وارڈ بنانے پر اتفاق کیا گیا۔ اس موقع پر لاہور رنگ روڈ کے اطراف میں میگا میڈیکل سٹی قائم کرنے کی تجویز پر غورکیا گیا۔
تفصیلات کے مطابق اجلاس میں بتایا گیا کہ مراکز صحت کا نظام ینگ ڈاکٹرزکے سپرد کرنے کے بعد مریضوں کی تعداد میں3 گنا تک اضافہ دیکھنے میں آیا ہے۔ 225آر ایچ سی ری ویمپنگ مکمل ہونے کے بعد نئے شاندار کلینک میں بدل گئے۔ مراکز صحت کو مریضوں کے لئے ابتدائی ریفرل سنٹر بنایا جائے گا۔ مراکز صحت میں بڑے ہسپتالوں کے برابر طبی سہولتیں فراہم کی جائیں گی۔ جنرل سرجری، گائنی،تشخیص، طبی ٹیسٹ اور دیگر سہولیات بھی میسر ہونگی۔ آر ایچ سی کی آؤٹ سورسنگ کے بعد نئے کلینک ہفتہ بھر 24گھنٹے کھلے رہیں گے۔ وزیراعلیٰ مریم نواز نے مری کے سامبلی جنرل ہسپتال کی رابطہ سڑکوں کی تعمیر و توسیع کی ہدایت کی۔
وزیراعلیٰ مریم نواز نے نوازشریف انسٹی ٹیوٹ آف سرگودھا کی او پی ڈی کو جون تک فنکشنل کرنے اور نوازشریف کینسر ہسپتال کو مقررہ مدت میں فعال کرنے کا حکم دیا۔وزیراعلیٰ نے جناح ہسپتال پی آئی سی ٹو کو 30ستمبر تک فعال کرنے کی ہدایت کی اور بورڈ ز آف گورنر کی نامزدگی اور دیگر امور کی جلد تکمیل کا حکم بھی دیا۔ اجلاس میں وزیراعلیٰ کو تفصیلی بریفنگ میں بتایا گیا کہ پنجاب کے 1147مراکز صحت میں سے 766کی ری ویمپنگ مکمل ہوچکی جبکہ 396محکمہ صحت کے سپرد کر دیئے گئے۔ پنجاب بھر کے او پی ڈی میں 6ارب 70کروڑ سے زائد کی مفت ادویات فراہم کی جا چکی ہیں۔
بریفنگ میں مزید بتایا گیا کہ مریم نواز کمیونٹی ہیلتھ انسپکٹر پروگرام کے لئے 12671 درخواستیں موصول ہوچکی ہیں۔مریم نوازکمیونٹی ہیلتھ انسپکٹر پروگرام کے تحت گھروں کے سروے، ڈیٹا، بیماریاں اور دیگر تفصیلات حاصل کی جائیں گی۔ مریم نوازہیلتھ کلینک پروگرام کے تحت ہیلتھ منیجر پورٹل پر 2230 درخواستیں موصول ہوئی ہیں۔ چیف منسٹر سپیشل اینی شیٹیو ٹرانسپلانٹ پروگرام کے تحت پانچ رینل اور ایک لیور ٹرانسپلانٹ کامیابی سے مکمل کر لیا گیا۔ چیف منسٹر چلڈرن ہارٹ سرجری پروگرام کے تحت 6900 مریض رجسٹرہوئے جس میں سے 2625 مستفید ہوچکے ہیں۔ چیف منسٹر ڈائیلسز پروگرام کے تحت 8ہزار سے زائد مریضوں کا ڈائیلسز مکمل کر لیا گیا اور مزید 7630 مریض رجسٹر ہوئے ہیں۔ پنجاب بھر میں کلینک آن ویل سے 72لاکھ مریض مستفید ہوچکے ہیں۔
وزیراعلیٰ مریم نواز نے کہا کہ پنجاب کے سرکاری ہسپتالوں میں 100فیصد بہتری لانا ہدف ہے۔ ہسپتالوں میں مناسب صفائی نا ہونا انتہائی افسوسناک اور تکلیف دہ امر ہے۔پسماندہ اور دوردراز علاقوں کے عوام کو بھی جدید ترین طبی سہولتوں کی ضرورت ہے۔ پنجاب کے تمام ہسپتالوں میں ضرورت کے مطابق جدید ترین طبی آلات مرحلہ وار فراہم کررہے ہیں۔ڈاکٹروں اور سٹاف کی کمی کے مسئلے پر قابو پانے کے لیے پائیدار اقدامات کیے جارہے ہیں۔