تحریک انصاف کے اہم رہنما پارٹی چھوڑ کر پیپلز پارٹی میں شامل ہو گئے

کراچی(قدرت روزنامہ ) پی ٹی آئی کے سابق امیدوار برائے چیئرمین اور یوسی 4 چنیسر ٹان کے سابق نائب ناظم اکرم مغل نے پاکستان پیپلزپارٹی میں شمولیت کا اعلان کر دیا۔

تفصیل کے مطابق اکرم مغل نے صوبائی وزیر سعید غنی کی موجودگی میں پاکستان پیپلزپارٹی میں شمولیت کی باضابطہ طور پر تصدیق کی۔ اس موقع پر اکرم مغل نے کہا کہ وہ پاکستان پیپلزپارٹی کے صدر آصف علی زرداری اور چیئرمین بلاول بھٹو کی قیادت پر مکمل اعتماد کرتے ہیں اور اسی اعتماد کی بنیاد پر انہوں نے پیپلزپارٹی میں شمولیت کا فیصلہ کیا ہے۔

اکرم مغل نے اپنی سیاسی زندگی پر روشنی ڈالتے ہوئے کہا کہ انہوں نے تین الیکشن میں حصہ لیا، جن میں سے دو میں کامیابی حاصل کی۔ انہوں نے بطور وائس چیئرمین بھی اپنے فرائض ادا کیے اور 2001 میں کونسلر منتخب ہوئے۔ اکرم مغل کا کہنا تھا کہ انہوں نے پی ٹی آئی میں بھی خدمات انجام دی، مگر اب وہ پاکستان پیپلزپارٹی کی قیادت میں شمولیت کو ایک نیا قدم سمجھتے ہیں۔اکرم مغل کی پی ٹی آئی سے پی پی پی میں منتقلی سیاسی حلقوں میں اہمیت اختیار کر گئی ہے، کیونکہ اس فیصلے سے یہ ظاہر ہوتا ہے کہ مقامی سطح پر سیاسی وابستگیاں اور پارٹی تعلقات کتنی تیزی سے بدل سکتے ہیں۔ اس شمولیت کے بعد اکرم مغل کا کہنا تھا کہ وہ پی پی پی کے منشور اور قیادت پر اعتماد رکھتے ہیں اور پارٹی کے مقاصد کے لیے کام کریں گے۔