دوسری خواتین سے بات کرنے سے منع کیوں کیا؟ کراچی میں ظالم شوہر نے بیوی کو جلا دیا

کراچی(قدرت روزنامہ)شہر قائد میں شوہر نے دوسری خواتین سے بات کرنے سے منع کرنے پر بیوی کو جلا دیا۔

نجی ٹی وی چینل آج نیوز کے مطابق کراچی کے علاقے کورنگی مہران ٹاؤن میں شوہر نے پیٹرول چھڑک کر بیوی کو آگ لگا دی، متاثرہ خاتون رابعہ بی بی 40 فیصد جھلس گئی۔

پولیس کے مطابق تھانہ کورنگی انڈسٹریل ایریا میں متاثرہ خاتون کی مدعیت میں مقدمہ درج کر لیا گیا، مقدمہ اقدام قتل کی دفعات کے تحت درج کیا گیا، واردات کے بعدملزم کوعظیم پورہ سے گرفتار کرلیا گیا۔

پولیس نے بتایا کہ ملزم وقاص نے رابعہ سے 2 سال قبل پسند کی شادی کی تھی، ملزم فیکٹری میں ملازمت کرتا ہے، ملزم اپنی بیوی پر تشدد کرتا تھا۔پولیس حکام کے مطابق ملزم وقاص کی دوسری خواتین سے دوستی تھی، بیوی کے منع کرنے پر ملزم نے پیٹرول چھڑک کر اسے آگ لگا دی۔

پولیس کے مطابق گرفتار ملزم سے مزید تفتیش جاری ہے، جبکہ متاثرہ خاتون رابعہ سول ہسپتال برنس وارڈ میں زیر علاج ہے۔