وزیراعلیٰ پنجاب مریم نواز کا خصوصی بچوں کیلئے تاریخی اقدامات کا اعلان،’سی ایم میل پروگرام کا آغاز کر دیا

لاہور(قدرت روزنامہ)وزیراعلیٰ پنجاب مریم نواز شریف نے خصوصی بچوں کی فلاح و بہبود کے لیے “سی ایم میل پروگرام” (CM Meal Program) اور “ہمت کارڈ” کا باقاعدہ آغاز کر دیا ہے۔ تقریب سے خطاب کرتے ہوئے انہوں نے کہا کہ خصوصی بچے ریاست کی ذمہ داری ہیں اور پنجاب حکومت ان کی تعلیم، صحت اور خوراک کا ہر ممکن خیال رکھے گی۔
اہم اعلانات اور اقدامات:
سی ایم میل پروگرام: مریم نواز نے بتایا کہ صوبے بھر کے 303 اسپیشل ایجوکیشن کے اداروں میں زیر تعلیم 45 ہزار سے زائد بچوں کو روزانہ کی بنیاد پر غذائیت سے بھرپور دودھ اور بسکٹ فراہم کیے جائیں گے، جس سے اسکولوں میں داخلوں کی شرح میں اضافہ ہوا ہے۔
ہمت کارڈ کا اجراء: وزیراعلیٰ نے 65 سے 70 ہزار خصوصی افراد کے لیے “ہمت کارڈ” کا اعلان کیا، جس کے ذریعے ماہانہ وظیفہ براہ راست مستحقین تک پہنچایا جائے گا تاکہ والدین پر مالی بوجھ کم ہو۔
آٹزم اسکول: انہوں نے خوشخبری سنائی کہ لاہور میں پاکستان کا پہلا سرکاری “اسکول فار آٹزم” تکمیل کے آخری مراحل میں ہے جہاں بچوں کا علاج اور تعلیم 100 فیصد مفت ہوگی۔
اسپیشل ٹرانسپورٹ: مریم نواز نے بتایا کہ خصوصی بچوں کے لیے 60 سے زائد گرین بسیں فراہم کی گئی ہیں جن میں ریمپس اور سی سی ٹی وی کیمرے نصب ہیں تاکہ بچوں کی سیفٹی اور سفر میں آسانی کو یقینی بنایا جا سکے۔
میڈیکل اسکریننگ اور سرجری: پنجاب حکومت نے پہلی بار 40 ہزار خصوصی بچوں کی اسکریننگ کی، جس کے بعد 30 ہزار بچوں کا مفت علاج اور سرجری کی گئی، جن میں کوکلیئر امپلانٹس، آنکھوں کے آپریشن اور دیگر پیچیدہ سرجریاں شامل ہیں۔
ذاتی تعلق اور جذبات: مریم نواز دورانِ خطاب آبدیدہ ہو گئیں اور اپنی بہن عاصمہ نواز کے بیٹے ابراہیم کا ذکر کرتے ہوئے کہا کہ وہ خود ایک اسپیشل بچے کی خالہ ہیں اور جانتی ہیں کہ ایسے بچے گھر کے لیے کتنی بڑی رحمت ہوتے ہیں۔ انہوں نے تمام خصوصی بچوں کی ماؤں کو خراج تحسین پیش کرتے ہوئے انہیں ‘سپر ہیرو’ قرار دیا۔
سیاسی مخالفین پر تنقید: اپنے خطاب میں وزیراعلیٰ پنجاب نے سیاسی مخالفین کو بھی آڑے ہاتھوں لیا۔ انہوں نے کہا کہ سمجھ نہیں آتی کہ دھرنے، جلاؤ گھیراؤ اور فتنہ فساد کرنے والوں کو اتنا وقت کہاں سے ملتا ہے۔ انہوں نے کہا، “وزارتِ اعلیٰ کوئی تفریح یا طاقت کا ذریعہ نہیں بلکہ ایک بھاری ذمہ داری ہے، جس کا جواب اللہ کو دینا ہے۔ میں جتنا کام کر لوں، مجھے کم لگتا ہے۔”
مریم نواز نے محکمہ اسپیشل ایجوکیشن اور پی آئی ٹی بی کی کارکردگی کو سراہتے ہوئے کہا کہ یہ ایک نیا پنجاب ہے جہاں ریاست ماں کے جیسی ذمہ داری نبھا رہی ہے۔