ابوظبی میں بیلسٹک میزائل کی تباہی، سویحان اسٹریٹ پر ملبہ گرنے سے قیمتی جانیں ضائع، کیا اماراتی دفاعی نظام نے بڑا خطرہ ٹال دیا؟

ابوظبی (26 مارچ 2026) (ڈیلی قدرت نیوز) متحدہ عرب امارات کے دارالحکومت ابوظبی میں بیلسٹک میزائل کے ملبے کی زد میں آکر 2 افراد جاں بحق اور 3 زخمی ہو گئے ہیں۔ اماراتی حکام نے تصدیق کی ہے کہ ملک کے جدید فضائی دفاعی نظام نے ایک بڑے حملے کو ناکام بناتے ہوئے دشمن کے بیلسٹک میزائل کو فضا میں ہی جلا کر راکھ کر دیا، تاہم اس کے گرنے والے ملبے نے جانی و مالی نقصان پہنچایا ہے۔
تفصیلات کے مطابق، یہ واقعہ ابوظبی کی مصروف سویحان اسٹریٹ (Sweihan Street) پر پیش آیا جہاں فضا میں ہونے والے زوردار دھماکے کے بعد میزائل کے ٹکڑے زمین پر آ گرے۔ حکام کا کہنا ہے کہ ملبہ گرنے کے نتیجے میں 2 افراد جاں بحق ہوئے جبکہ 3 زخمیوں کو فوری طور پر طبی امداد فراہم کی گئی۔
میزائل کے ٹکڑے لگنے سے سڑک پر موجود متعدد گاڑیوں کو بھی شدید نقصان پہنچا ہے۔ واقعہ کے فوری بعد امدادی ٹیمیں اور سیکیورٹی فورسز جائے وقوعہ پر پہنچ گئیں اور علاقے کو گھیرے میں لے کر صورتحال کو قابو میں کر لیا۔
عوام کے لیے اہم ہدایت
اماراتی حکام نے شہریوں اور مقیم افراد سے پرزور اپیل کی ہے کہ وہ اس حساس صورتحال میں صرف سرکاری ذرائع سے حاصل ہونے والی معلومات پر یقین کریں اور سوشل میڈیا پر گردش کرنے والی غیر مصدقہ خبروں یا افواہوں کو پھیلانے سے گریز کریں۔ وزارتِ دفاع نے اعادہ کیا ہے کہ ملک کا دفاعی نظام ہر قسم کے جارحانہ عزائم کو ناکام بنانے کی مکمل صلاحیت رکھتا ہے۔