ہنگو: دہشتگردوں کے حملے میں شہید 10 اہلکاروں کی نماز جنازہ ادا

ہنگو(قدرت روزنامہ)ہنگو میں دہشتگردوں کے حملے میں شہید 10 اہلکاروں کی نماز جنازہ ادا کردی گئی۔

ہنگو میں خزینہ بانڈہ پولیس چیک پوسٹ پر دہشت گردوں کے حملے میں ڈی ایس پی سٹی دیار خان سمیت 10 اہلکار شہید ہوگئے، شہید ہونے والے 10 اہلکاروں کی نمازجنازہ ادا کردی گئی، سول انتظامیہ پولیس افسران اور شہریوں نے شرکت کی۔

پولیس کے مطابق حملے میں 20 سے زائد اہلکار زخمی ہوگئے جبکہ جوابی کارروائی میں 10 سے زائد دہشت گرد ہلاک ہوگئے۔

دوسری جانب پشاور میں تھانہ متنی کی چوکی ادیزئی پر فتنہ الخوارج کا حملہ ناکام بنادیا گیا۔ علاقے میں سرچ آپریشن جاری ہے۔

وزیراعلیٰ خیبرپختونخوا سہیل آفریدی نے ہنگو میں پولیس چیک پوسٹ پر حملے کا نوٹس لے لیا، وزیراعلیٰ نے آئی جی پولیس سے واقعے کی رپورٹ طلب کر لی۔

وزیراعلیٰ سہیل آفریدی نے کہا کہ شہداء کے لواحقین کو ہر ممکن معاونت فراہم کی جائے گی، دہشت گردی کے خلاف جنگ میں خیبرپختونخوا پولیس کی قربانیاں ناقابلِ فراموش ہیں، قیامِ امن ہماری اولین ترجیح ہے، پولیس فورس کی قربانیوں کو رائیگاں نہیں جانے دیں گے۔